ር. ሊ. ጳ. ኣብ ማእከላይ ምብራቕ እናገደደ ኣብ ዝኸደሉ ዘሎ እዋን ብተስፋ ክጸንዑ ተሕጸኑ
ኣባ ተወልደ መብራህቱ - ሃገረ ቫቲካን
ርእሰ ሊቃነ ጳጳሳት ፍራንቸስኮ ሎሚ ረቡዕ ብዛዕባ እቲ ኣብ ማእከላይ ምብራቕ እናገደደ ዝኸይድ ዘሎ ወጥሪ ዘለዎም ዓሚቝ ሻቕሎት ገለጹ፣ እዚ ድማ ክሳዕ ክንደይ ናብ ምልኣተ ግጭታትን ውግእን ከየስፋሕፍሕ ኣጠንቀቑ ።
ሰበ-ስልጣን ፍልስጥኤም ሎሚ ረቡዕ ኣብቲ እስራኤላውያን ኣብ ምዕራባዊ ገምገም ባሕሪ ዝፈነዉዎ ወራር እንተ ወሓደ ትሽዓተ ሰባት ከም እተቐትሉ ተዓዘብቲ ኸኣ ዝሰፍሐ ውግእ ከይህሉ ኣብ ዘስግኣሉ ዘሎ ኩነታት ኢዮም ቅዱስነቶም ነዚ ቃላት እተዛረቡ።
ርእሰ ሊቃነ ጳጳሳት ኣብቲ ዝለገሱሎም ቃል ማዕዳን ነቶም ኣብ ሮማ ኣብ ዝተኻየደ ጉባኤ ጳጳስት እተሳተፉ "እቲ ግጭት ፍትሓዊ ፍታሕ ኣብ ክንዲ ዝረክብ ሕዱር እናዀነ ዝኸይድ ከም ዘሎ ኢዩ ዝመስል፣ እዚ ኸኣ ናብ ብምሉኡ እቲ ዞባ ናይ ምዝርጋሕን ናይ ምብራዕን ሓደጋ ኣለዎ" ብምባል ኣጠንቀቑ።
ቅዱስ ኣቦና ኸም ዝገለጽዎ እዚ ዅነታት እዚ ማእለያ ዘይብሉ ሞትን ዓብዪ ዕንወትን ከምኡውን ስቓይ ኣስዒቡ እዩ፣ እዚ ኸኣ ጽልእን ቂምን ከም ዚሰፍን ገይሩ ኣሎ፣ እዚ ኸኣ ኣብ መጻኢ ዜሕዝን ፍጻመታት ኬስዕብ ይኽእል እዩ ክብሉ ውን ዘለዎም ስግኣታት ኣመልከቱ።
ዘተን ሰላምን ከም ዝህሉ ግበሩ
እቲ ዘሎ ዅነታት ከቢድ እኳ እንተ እተኾነ፣ ርእሰ ሊቃነ ጳጳሳት ብተስፋ ምጽናዕን ሓድነት ምዅስኳስን ኣድላዪ ምዃኑ ኣጕልሑ፣ ነቶም ጳጵሳት ከኣ ኣብ እምነቶም ጸኒዖም ክቕጽሉን ናይ ሰላም ዘተ ከስፍሑን ብምትብባዕ ምስኣቶም ዘለዎም መንፈሳዊ ቅርበት ኣረጋገጹሎም።
"ጐይታ ምስ ኵሉ ሰብ ብኣኽብሮትን ብቕንዕናን ብምዝርራብን እውን ከይተረፈ ኣብኡ እምነት ንምምስካር ወትሩ ሓይሊ ይህበኩም" ክብሉ ውን መረቕዎም።
ምልክት ተስፋ
ቅዱስነቶም እቲ ዝነብረ ቀንዲ መልእኽቶም ነቶም ጳጳስት ኣብ መንጎ ተስፋ ቍርጸት ምልክት ተስፋ ክዀኑ ንምትብባዕን "ነታ ተስፋ ህያው ግበርዋ! ብቃላትን ብተግባርን ሰላምን ሕውነትን ኣኽብሮትን ዜንጸባርቑ ቕድመ-ተስፋ ኹኑ" በልዎም።
ርእሰ ሊቃነ ጳጳሳት ኣብ ዘቕረቡሎም ቃል ምሕጽንታ ነቲ "ዝጠፍአ ዝመስል ሃልሃልታ ተስፋ" ብምዃኖም ውን ኣመስገንዎም፣ ዕርቂ ንምግባርን ነቲ ሱር ዝሰደደ ምክፍፋል ብሰናይ ፍቓድ ንምስጋርን ብቐጻሊ ክዓዩ ድማ ኣተባብዕዎም።
ኣገዳስነት ሓዋርያዊ ጕስነት
ኣብ መወዳእታ ርእሰ ሊቃነ ጳጳሳት እቶም ተጋብእቲ ብፍላይ ኣብ ህዝባዊ ኣብያተ - ትምህርቲ ብፍላይ ከኣ ኣብቲ ክርስትያን ምእመና ሒደት ዝዀኑሉ ከባቢታት እኹል ክርስትያናዊ ትምህርቲ ምሃብ ኣድላዪ ምዃኑ ውን ኣጕልሑ ።
እዚ ተልእኾ እዚ ዘለዎ ዓሚቝ ጥቕሚ ነቶም ምእመናን ብዛዕባ እምነት ዘለዎም ምርዳእ ንኸዕምቝን ዘዕግብ ክርስትያናዊ ተስፋ ንኽህልዎምን ከም ዝሕግዞም ምዃኑ ገለጹ ።
ርእሰ ሊቃነ ጳጳሳት ነቶም ጳጳሳት ስለቲ ዝገበርዎ ምብጻሕ ብምምስጋን ከምኡውን ዕቝባን ምጽንናዕን እኖና ድንግል ማርያም ብምልማን መደረኦም ዛዘሙ - "ብምሉእ ልበይ እባርኸኩም ኣለኹ። ንሓድሕድና ንጸሊ" ድማ በልዎም።