蜜桃交友

“HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die décimo tértio mensis IúIii anno bismillésimo vicésimo quarto

TÍTULI

Francíscus, Pastor, Tergéste invísit: scándalum sit fides cuiúsdam societátis refértae rerum consumendárum collúvie
Agendárum rerum index est éditus Pontíficis itíneris mense Septémbri in Ásiam et Oceániam suscipiéndi.
In Ucraína et Gaza ob interniciónes “magno dolóre” affícitur Póntifex.
Salútem plúrimam ómnibus vobis auscultántibus núntios Latínos dicit Amadéus Lomonaco.

NOTÍTIA 1

Superióre die domínico séptimo mensis Iúlii Francíscus Papa   se cóntulit, cum quinquagésima hebdómada catholicórum Italórum agerétur. Refert Rosarius Tronnolone.

Primum habens sermónem, Tergéste Pastor invísens Póntifex asséruit “indifferéntem ánimum cancrum esse populáris diciónis”: “Omnes esse partem cuiúsdam constituéndae communitátis se putáre debent”. In homília Missae Póntifex autumávit “scándalo fídei nos indigére”, quae fides “e torpóre éxcitet consciéntias, quae ulcus tangat” cuiúsdam societátis “consopítae ac rerum consumendárum ob congériem hebescéntis”. Missa celebráta, in Angélica Salutatióne palam dixit Póntifex “quámlibet persónam, sanam vel infírmam, grandem vel parvam, quámlibet útique persónam frui dignitáte”. Postulávit tandem Póntifex ut orarétur “pro funestáta Ucraína, Palaestína, Sudánia, Myanmár ac pro quavis gente propter bellum patiénte”.

NOTÍTIA 2

Index agendárum rerum itíneris Pontíficis mense Septémbri in Ásiam et Oceániam suscipiéndi est éditus. Sílvia Giovanrosa refert:

Saltem círciter duódecim sermónes annumerántur, quáttuor homíliae, tótidem quot sunt Natiónes intra duódecim dies inviséndae: quod secum fert index rerum agendárum itíneris Pontíficis in Indonésiam, Pápuam Novam Guinéam, Timor-Leste et Singapúram perficiéndi a die áltero ad diem tértium décimum mensis Septémbris consequéntis. Aeropláni dumtáxat consideráto itínere, trigínta tria kiliómetra cónficit Póntifex, ex volátu quadragínta quáttuor horárum. Hoc est longíssimum ómnium iter. Numquam adhuc tam diu ac tam longe ab Urbe Vaticána áfuit Francíscus.

Apostólicum iter in Ásiam et Oceániam faciúndum, quod est fere orbis terrárum circuítio, per Sedem Vaticánam diurnariórum innótuit.

NOTÍTIAE BREVÍSSIMAE

Postquam Kióviae in Ucraína valetudinárium ictum est aeque ac Gazae schola, cum innúmeri hómines sunt interémpti et vulneráti, quodam ex núntio “magnam ánimi permotiónem” osténdit Póntifex augescéntis propter violéntiae sériem. Qui Póntifex est quoque hortátus ut “quaedam reperiréntur viae quae praeséntibus bellis finem impónerent”.

Novum statútum comprobátum est Retis Mundiális Precatiónis Pontíficis quod Societáti Iesu est commíssum. Síngulis ménsibus foras emíttitur “Pontíficis núntius televisíficus” demónstrans a Pontífice significátam precatiónem, retis ope in octogínta novem Natiónibus vigéntis.

Haec habúimus quae dicerémus, nova proferénda, próxima hebdómada.