蜜桃交友

HEBDOMADA PAPAE”
   Notitiae Vaticanae Latine redditae
       Die tricésima mensis Mártii anni bismillésimi vicésimi quarti

(TITULI)
In Missa chrísmatis Papa hortátur sacerdótes, ne cedant clericáli falláci simulatióni: lácrimas habeátis, quae cor mundant.
Domínicae in Palmis de Passióne Dómini celebratióni in Foro Petriáno praesídet Francíscus, qui in Salutatióne Angélica pro víctimis «sórdidi scéleris terróris» Mosquae precátur.
In Via Crucis ad Amphitheátrum Flávium meditatiónes a Sancto Patre primum conscrípta.

Cuncta felícia exóptat ómnibus vobis Catharína Agorelius, haec verba audiéntibus in notitiário língua Latína proláta.

(NOTITIAE)
In Missa chrísmatis féria quinta in Cena Dómini celebráta Francíscus transfigéntis paeniténtiae effert pulchritúdinem: acérbae lácrimae vitam valent immutáre. Refert Alexánder De Carolis.

"Sine paeniténtia et lácrimis, cor induréscit". Tamen "Sícuti gutta cavat lápidem, ita lácrimae cordis cavant durítiam". Hoc miráculum est "bonae maestítiae, quae ad dulcédinem ducit", éxtulit Papa coram quattuor mílibus fere fidélium, e quibus mille et quingénti sacerdótes, qui in Basílicam Sancti Petri pervenérunt ad Missam chrísmatis fériae quintae in Cena Dómini celebrándam, cui ipse praesédit, adstánte ad altáre Cardinále Vicário Ángelo De Donatis. Francíscus confimávit quod "nos ipsos lugére" vult ex ánimo paenitére et "concédere se via sanctitátis deerravísse", atque adhortátus est, ne clericális fallácis simulatiónis cedátur discrímini.

Domínica vicésima quarta mensis Mártii Papa in Foro Petriáno Domínicae in Palmis de Passióne Dómini celebratióni praesédit. De his lóquitur Rosárius Tronnolone.

In Foro Petriáno Francíscus Missam Domínicae in Palmis de Passióne Dómini praesédit, quae incépit – sicut ex more trádito – intróitus Dómini Hierosólymam commemoratióne. Memóriam Passiónis siléntii et meditatiónis spátium secútum est. Dolor Christi dolóres universórum témporum universíque humáni géneris ampléctitur et humánum genus cum fragilitátibus suis Dómino offértur in Oratióne domínica seu fdélium, quae Litúrgia Verbi conclúsit.

(NOTITIAE BREVES)
Hoc anno Sanctus Pater Francíscus meditatiónes Viae Crucis ad Amphitheátrum Flávium primum conscrípsit féria sexta in Passióne Dómini hábitae. «Orémus cum Iesu super viam Crucis» meditatiónum fuit arguméntum.

Patiéntia «máxima vitamína» est christifidélis: hoc asseverávit Papa Francíscus in Audiéntia Generáli féria quarta praetérita, de eádem loquens virtúte, quae radicem suam habet amórem, quo Christus dolóribus respondet.

Francíscus núntium ad púeros puellásque univérsi terrárum orbis vertit, quinto occurrénte anniversário ab Adhortatióne Apostólica post-synodáli Christus vivit: Christus vivit et te máxime díligit – Ipse scripsit –lapsus errorésque nullíus moménti eídem sunt.

Haec ómnia pro hac editióne, próxima hebdómada conveniémus.