Hebdomada Papae, o boletim em latim do Pope
“HEBDÓMADA PAPAE”
NOTÍTIAE VATICÁNAE LATÍNE RÉDDITAE
Die tricésimo mensis Decémbris anno bismillésimo vicésimo tértio
TÍTULI
In Generáli Audiéntia Póntifex effátur: cum diábolo nullus instituéndus diálogus, magni refert cor custodíre. Ad pacem in Terra Sancta et Ucraína conciliándam íterum adhortátio.
In noctis Dómini Nativitátis Missa atque Urbi et Orbi Benedictióne clamat Francíscus: bellum sine excusatióne est stultítia.
Angélicae Precatiónis témpore die sexto et vicésimo mensis Decémbris Póntifex monet per mártyrum necem hóminum Deum convértere corda.
Salútem plúrimam cunctis auscultántibus dicit Catharína Agorélius.
NOTÍTIA 1
“Cum quis boni ac mali esse vult dóminus, in temptatiónem íncidit”, quod “periculósius hóminum córdibus insidiátur”. Haec in Audiéntia Generáli enuntiávit Francíscus, novam seriem éxhibens catechésis vitiórum virtutúmque arguméntum tractántem. Exínde dénuo cohortátio in locis contentiónibus funestátis ad pacem deprecándam. Refert Alexánder De Carolis.
Catechésis séries de vítiis ac virtútibus agit: quae in Audiéntia Generáli die Mercúrii vicésimo séptimo mensis Decémbris, in Aula Páuli sexti, incohátur. Francíscus Papa id enuntiávit, dicens húius cogitatiónis inítium ex Génesis libro sumi posse, ubi “mali ac temptatiónis vis” narrátur. Salútans, Natiónes contentiónibus vastátas memorávit, íterum iterúmque poscens pacem “potíssimum pro vexáta Ucraína ac géntibus in Palaestína et Ísraël commorántibus”. “Bellum est malum”, iterávit, cohórtans ad orándum “pro bellis iníbi exstinguéndis”.
NOTÍTIA 2
“Hac nocte históriam mutat amor”. Quod autumávit Póntifex die vicésimo quarto mensis Decémbris in noctis Dómini Nativitátis Missa. Postrídie Urbi et Orbi benedictiónem impértiens, se bello adversári iterávit Francíscus, confírmans panem velle pópulum, mínime arma. Lóquitur Olga Sakun.
De terra cógitans, ubi Deus caro factus est ac ubi “armórum strépitus hódie quoque ímpedit quóminus in terrárum orbe domicílium inveniátur”, praetérito die vicésimo quarto mensis Decémbris noctis Dómini Nativitátis Missae intra Papálem Basílicam Sancti Petri praesédit Pontifex, concelebrátae fere per ducéntos quinquagínta cardináles, epíscopos, presbýteros ac diáconos. Die quinto et vicésimo mensis Decémbris ex mediána Basílicae contignatióne allocútus est fere septuagínta mília fidélium in Petriano Foro coadunatórum, translatíciam impértiens Urbi et Orbi benedictiónem. Mentiónem fecit Póntifex Terrae Sanctae, quae vi delétur, qui item pro Ucraína, Sýria, Líbano, Yemen, Coréa et África orávit, armórum commércium simul íncrepans, quae “bellórum sortes moderántur”.
NOTÍTIAE BREVÍSSIMAE
Die festo sancti Stéphani in Angélica Precatióne, protomártyris memorávit Póntifex testificatiónem, eos éfferens qui hodie quoque moriúntur Iesum testificántes, ac páriter confírmans eórum mortem fructum latúram. Post Mariálem precatiónem protomártyris intercessióni “pópulos bello laniátos” commendávit.
Haec habúimus quae dicerémus. Próxima hebdómada novum annum incohatúris ómnia próspera vobis evéniant.
Obrigado por ter lido este artigo. Se quiser se manter atualizado, assine a nossa newsletter clicando aqui e se inscreva no nosso canal do WhatsApp
