蜜桃交友

HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die tricésimo mensis Septémbris anno bismillésimo vicésimo tértio

TÍTULI

In Generáli Audiéntia Póntifex ait: ne sit Mediterráneum mare sepúlcrum, sed cultus speíque véluti tessellátum fulciméntum.

Angélicae Precatiónis catechésis Francísci ac de Die mundiáli migrántis et pérfugae verba referúntur.

In Urbe Vaticána “Sensus Univérsitas” ad Pontíficis voluntátem cónditur, quae moderánda ad Scholas Occurréntes commíttitur.

Salútem plúrimam ómnibus vobis dicit Catharína Agorélius audiéntibus núntios Latínos.

NOTÍTIA 1

In Audiéntiae Generális catechési, die Mercúrii séptimo et vicésimo mensis Septémbris, Póntifex de itínere in Massíliam est locútus, ubi diébus vicésimo áltero et vicésimo tértio est commorátus, atque ínibi in primis “Mediterráneos occúrsus” absolvéndos  participávit. Lóquitur Alexánder De Carolis.

“Suam propensiónem répetat Mediterráneum mare, officínae scílicet cultus ac pacis”. Hoc fuit “Mediterraneórum occúrsuum” propósitum, qui Massíliae praetérita hebdómada acti sunt, in qua Francogállica urbe sub Apostólici itíneris nómine duos dies mansit Póntifex. Sómnium fuit ac provocátio, asseverávit Francíscus, novíssimae  Audiéntiae Generális témpore, die Mercúrii in Petriáno Foro, de iis lóquens quae expértus est. De migrántium et perfugárum dignitáte dísserens, Póntifex planum perspícue fecit tolerári non posse Mediterráneum mare sepúlcrum fíeri, quod pótius  “spei núntius” sit, ut Európa dénuo fiat “cultus speíque véluti tessellátum fulciméntum”.

NOTÍTIA 2

In Angélica Precatióne, die domínico vicésimo quarto mensis Septémbris, commónuit Francíscus ut a “mercábili” necessitúdine cum Deo caveátur. Déinceps mariáli precatióne dicta, de Die mundiáli migrántis ac pérfugae quaedam dixit. Refert Mónia Parente.

Sicut víneae dóminus, in Evangélii similitúdine figurátus, quam domínicae sacra litúrgia die vicésimo quarto mensis Septémbris propósuit, mérita nostra non cómputat Deus, sed ut fílios nos díligit. Quod Francíscus Papa explicávit, coram multíplici coróna círciter duodevigínti mílium fidélium, e regióne fenéstrae palátii apostólici adstántium et Vírginem Maríam precántium. Francíscus de perículo mónuit “necessitúdinis  ‘mercábilis’ cum Deo, cum nostra virtúte magis confídimus quam eius liberalitáte ac grátia, quóniam Deus –áddidit – nos usque conquírit, in quavis diéi hora. Hinc orta est adhortátio ut nos christiáni interrogémus de facultáte ad álios accedéndi. Adstántes salútans, post Angélicam Precatiónem, cum Dies mundiális migrántis et pérfugae celebrarétur, necessitátem confirmávit Póntifex cunctis praestándi “cópiam dignam vitam vivéndi apud societátem in qua quisque repéritur.

NOTÍTIAE BREVÍSSIMAE

Per chirógraphum diéi quinti décimi praetériti mensis Augústi, in Urbe Vaticána “Sensus Univérsitas” a Francísco Papa est cóndita, “institútum nempe universitátis civílis, cuius domicílium in Urbe Vaticána locátur”, ut universáli discrímini sensus subveniátur atque recípiens locus figurétur, ubi institútio rursus fingátur.

Finis fit loquéndi, próxima hebdómada rursus vobíscum érimus.