Hebdomada Papae: as notícias da semana em latim
“HEBDÓMADA PAPAE”
Notítiae Vaticánae Latíne rédditae
Die vicésimo primo mensis Máii anno bis millésimo vicésimo secúndo
(TÍTULI)
In Audiéntia Generáli, grátior est Deo iráta precátio – ait Póntifex - quam agéndi simulátus frigidúsque rigor.
Decem beátis sanctórum honóres a Francísco decernúntur. Sánctitas non est mirábilis virtus personárum, sed amor aliorúmque famulátus.
Excellentíssimus Gallagher Pontíficis nómine Ucraínam visit, pacem delatúrus.
Salútem plúrimam ómnibus vobis auscultántibus dicit Catharína Agorelius et bene felicitérque sit vobis audiéntibus núntios Latína lingua prolátos.
(NOTÍTIAE PRAECÍPUAE)
In décima Audiéntia Generáli, die duodevicésimo mensis Máii, senectúti dicáta, Iob imáginem exhíbuit Francíscus, exémplar osténdens hodiérnis tempóribus terrárum orbis, vulneráti propter pestiléntiam ac bellum. Lóquitur Alexánder de Carolis.
Iob “indignatiónem ob res amíssas in perseverántiam convértit Dei speratárum repromissiónum”, cuius intellégit lenitátem. Haec prótulit Póntifex in décima catechési de senectúte, in Foro Petriáno, Audiéntiae Generális témpore, innúmeros excípiens fidéles totíus terrárum orbis. Iob librum “in summo litterárum fastígio” collocávit Francíscus atque ipsúmque Iob “fídei testem descrípsit, qui ’depravátam fáciem’ Dei non récipit, sed coram malo suum clamórem edit, usque dum respóndeat Deus revelétque suum vultum, repúlsis amicórum simulatiónibus. “Eius doctrína nos iuvábit”, inquit Póntifex, qui dein adiécit, Iob quamdam esse similitúdinem, quae effert quod in vita re áccidit, scílicet rerum inópia, pestiléntia, quam virus coronárium indúxit, Ucraínae bellum.
Die quinto décimo mensis Máii in Petriáno Foro mirábilis fuit festívitas, quod círciter quinquagínta mília hóminum occupárunt, cum decem novi sancti renuntiaréntur. Refert Olga Sakun.
In homilía Missae sanctórum proclamandórum, memorávit Póntifex quómodo sánctitas cum “quadam própria ipsíus virtúte” haud vinciátur.
Intérdum, est Ipse argumentátus, bona ex nostra virtúte patráre conántes, sanctitátis exémplar effécimus, nimis sisténtis in nobis”, quamque “a cotidiána vita seiúnximus, pótius quam eándem cotídie conquirerémus et eam item amplecterémur”. At contra, vita christiána sanctitátem quae fert, est “simplex”, áddidit Francíscus, quippe quae Dei sit amor recéptus et in fratres translátus. Missae finem impónens íterum “eos gravióra offícia geréntes” implorávit Francíscus Papa, ut “pacis non belli essent artífices”.
(NOTÍTIAE BREVÍSSIMAE)
Die duodevicésimo mensis Máii archiepíscopus Richárdus Páulus Gallagher, Secretárius ab Éxteris negotiis Secretáriae Status, Ucraínam invísere incohávit, ubi tres menses bellum géritur. Leopólim invísit ac deínde Kióviam. Quod iter genti illi propinquitátem significáre vult, bello conféctae, ex consideratióne trigínta annórum diplomaticárum necessitúdinum Kióviae cum Sancta Sede.
“Nímiae sunt párvulae manus dignitáte exútae”: haec verba scrípsit Póntifex in núntio quodam ad Institutiónem mundiálem pro ópere (Ilo), quinta universáli interveniénte Conferéntia, quae Durbániae acta est in África Austráli, quaeque óperam dat ut púeri et adolescéntes ab ópere quaestus liberéntur. Francíscus postulávit ut studiósius hic mos delerétur ac párvulis vita restituerétur, qua frui debent.
Háctenus satis est, nova, próxima hebdómada.
Obrigado por ter lido este artigo. Se quiser se manter atualizado, assine a nossa newsletter clicando aqui e se inscreva no nosso canal do WhatsApp
