蜜桃交友

“HEBDOMADA PAPAE”
Notitiae Vaticanae Latine redditae
28 maggio 2022

TITOLI

Papa Francíscus in Audiéntia Generáli: senéctus anni tempus est prudéntiae in societáte lassitúdinis. Deínde omnes adhortátus est ad orándum pro pace in Ucráina.

Póntifex in prece Regína Coeli: pacem invocáre pro moderatóribus Natiónum. Ad Hebdómadam Laudato Si’ participándam invitávit et ad sociátam precatiónem cum cathólicis sinénsibus.

Ómnibus vobis cómiter salútem dicit Catharína Agorelius: optáti audiátis editiónem hanc nuntiórum latína língua prolatórum.

(SERVIZI)

In Audiéntia Generáli dié vicésimo quinto mensis máii hábita Póntifex meditatiónem de sénibus perréxit ad lumen libri sacri Qoélet. Post catechésim adhortátus est, ut christifidéles desidérium suum pacis in mundo précibus Dóminae Nostrae elátis commítterent. De his refert Alexánder De Carolis:

Papa Francíscus in catechési in Audiéntia Generáli diéi vicésimi quinti mensis máii trádita senectútem dénuo considerávit. Sacrum librum Qoélet seu Ecclesiásten révocans, éxtulit «senectútem a simuláta prudéntia concionatóris Qoélet díscere posse artem fráudis detegéndae sub delírio veritátis in mente fictae et omni iustítiae caréntis affectióne». Papa póstea incitávit senes ad iúvenes servándos «a temptatióne mundi intelléctus tristis et sapiéntiae vitae expértis». Demum, álloquens peregrínos in Foro Petriáno, christifidéles salútans polónos, Papa memóriam Beátae Maríae Vírginis Auxiliatrícis die vicésimo quarto mensis Maii celebrándam commonefécit monuítque ad «desidérium pacis in Ucráina et in univérso mundo» précibus Beátae Maríae Vírgini extolléndibus committéndum.

In precatióne Regína Coeli diéi vicésimi secúndi mensis Máii Papa Francíscus, pacem invócans, verba Iesu in Cena novíssima explanávit. Post precem invitávit ad Hebdómadam Laudato Si’ participándam atque cum cathólicis sinénsibus orándum die Beátae Maríae Vírginis Auxílii Christianórum, eórum patrónae. Ómnia refert Monia Parente:

Catechésis Francísci in oratióne Regína Coeli diéi vicésimi secúndi mensis Máii – adstántibus in Foro Petriáno vigínti quinque mílibus christifidélium –Evangélio domínicae enarrándo dicáta est, quod nos ad scaenam Iesu valedictiónis in Cena novíssima redúxit. Quae dimíssio est omnem osténdens – dixit Póntifex – cordis Iesu misericórdiam, qui a Spíritu Sancto pro nobis pacem expetívit, pro illis qui prope nos sunt, pro moderatóribus rerum publicárum in univérso mundo. Post precem Póntifex omnes invitávit ad incépta Hebdómadae Laudato Si’ participánda, quae – uti ipse docuit – «súscitat nos ad domum commúnem cordi habéndam» et commonefécit memóriam Beátae Maríae Vírginis Auxílii Christianórum, quae cathólici sinénses summa devotióne venerántur, Ecclésiam adhórtans, ut oratióne coniungátur pastóribus et christifidélibus in Sinis, qui áspera óbeunt adiúncta.

(NOTIZIE)

«Tempus est armórum commércium omni carens ratióne repudiándi». Dolórem suum et preces pro púeris et magístris interféctis expréssit Papa in appellatiónem exeúnte Audiéntia Generáli diéi vicésimi quinti mensis Máii actam. Mens Papae ad víctimas currit excídii in schola elementári, quod iúvenis quidam in Téxia e Foederátis Civitátibus Américae Septentrionális patrávit.

Haec ómnia sunt pro hac editióne; conveniémus íterum hebdómada próxima.