蜜桃交友

                                                 “HEBDÓMADA PAPAE”
                                          Notítiae Vaticánae Latíne rédditae
                      Die secúndo mensis Aprílis anno bis millésimo vicésimo secúndo

(TÍTULI)

In paeniténtiae celebratiónibus apud Sancti Petri papálem Basílicam Vírginem Maríam ínvocat Póntifex: líbera nos a crudéli hoc et insáno bello.
Francíscus indigenárum legatiónes Canadénses convénit: “dolórem nostrum auscultávit”.
Cardinális Krajewski Pontíficis nómine árceram tradit ad Ucraínae genti opem feréndam.

Felícem exóptat diem Márius Galgano ómnibus haec verba, lingua Latína proláta, audiéntibus.

(NOTÍTIAE PRAECÍPUAE)

Die quinto et vicésimo mensis Mártii paeniténtiae celebratiónibus praesédit Summus Póntifex apud Sancti Petri papálem Basílicam, cuius finem fáciens precatiónem recitávit Consecratiónis cunctórum hóminum, nominátim Rússiae et Ucraínae, Cordi immaculáto Maríae. Páulo ante eádem in Basílica nonnúllis fidélibus reconciliatiónis sacraméntum ministrávit. Lóquitur Rosárius Tronnolone.

Francíscus in sella sédens coram Vírgine María, finem horróris ínvocat, qui iterábilis hódie non videbátur. Imágo est quae litúrgiam désignat, in Vaticána Basílica die Véneris praetéritae hebdómadae actam. Transáctis diébus cunctam Ecclésiam est cohortátus Póntifex ut commúniter oráret pro bello restringuéndo, quod Európam orientálem plus quam mensem cruentáre pergit. Ántequam consecrátio agerétur – quam cardinális Krajewski simíliter apud Sanctuárium Fatiménse celebrávit – Póntifex sua peccáta est conféssus et póstea vicíssim nonnúllis fidélibus reconciliatiónis sacraméntum ministrávit, intra paeniténtiae celebratiónes in Basílica. Inde ardéntia verba Maríae supplicatiónis sunt proláta: “Líbera nos a Bello, serva mundum ab atómicis minis. Éffice ut bellum deleátur, pacis mundo cónsule. Fac nos communiónis artífices”. Subsequéntibus diébus s?pius eádem enuntiávit in Audiéntia Generáli, in Angélica Salutatióne aliísque occasiónibus, ut bellum propulsarétur “crudéle et pestíferum”.

Prima indigenárum legátio Canadénsis recépta est die duodetricésimo mensis Mártii in urbe Vaticána, interveniéntibus duábus audiéntiis. Una cum Pontífice delegátio fuit stirpis Métis cognominátae, áltera Inuit, comitántibus nonnúllis Epíscopis Conferéntiae episcopális Canadénsis. Audiéntia fuit pars illíus “veritátis, iustítiae ac reconciliatiónis itíneris”, quod locális Ecclésia suscépit, postquam quaedam grávia gesta exstitérunt. Refert Mónia Parente.

“Véritas, iustítia, sanátio, reconciliátio”. Hac “sárcina” onústi, Pontífici exhibénda cum Eóque communicánda, Romam venérunt, ad commúne iter suscipiéndum, quod probabíliter praetéritum non adímere, sed sanáre et árcere futúrum dolórem póterit. Partícipes trium Natiónum Canadénsium – quarum tértia, die Iovis praetérito, est recépta – grave arguméntum tractárunt, quod ad postréma decénnia s?culi décimi noni áttinet, cum púeri indígenae coácti sunt occidéntis cultum suscípere. Qui cursus vexatiónibus et abúsibus peráctus est, quocum Ecclésiae étiam scholae implicabántur. His ex audiéntiis, explicávit sedes diurnariórum, “occasiónem nactus est Póntifex auscultándi ac ponderándi doléntes res gestas, quae per supérstites illíus loci innotuérunt”.

(NOTÍTIAE BREVÍSSIMAE)

Íterum páucis hebdómadis, Eleemosynárius pontifícius, cardinális Conrádus Krajewski, Leópolim se cóntulit, in Ucraína, árceram traditúrus, donátam et a Pontífice benedíctam, quae urbis Ucraínae potestátibus est concrédita, quo iam diu conflúere solent prófugi illíus Natiónis, a Rússico exércitu obséssae.

Háctenus satis, nova próxima hebdómada.