蜜桃交友

HEBDÓMADA PAPAE”

Notítiae Vaticánae Latíne rédditae

Die undevicésimo mensis Februárii anno bis millésimo vicésimo secúndo

(TÍTULI)

“Sacérdos non est quidam ‘matrimónii expers’, at bonus pastor cuius cor continénter patet”. Papália sunt haec verba facta ad Sympósium de presbyterátu inaugurándum, quod comparávit Congregátio pro Epíscopis.

De Sancto Ioseph méditans, qui est Ecclésiae patrónus, sériem duodécim catechésium de patre Iesu putatívo in Audiéntia Generáli diéi Mercúrii Póntifex ad finem addúxit.

Per Lítteras apostólicas motu próprio datas, quasdam potestátes hucúsque ad apostólicam Sedem reservátas, ad Epíscopos Francíscus Papa tránstulit.

Salútem plúrimam ómnibus vobis auscultántibus núntios Latína lingua prolátos dicit Philíppus Herrera-Espaliat.

(NOTÍTIAE PRAECÍPUAE)

Non est plúribus disseréndum multáque doctrína afferénda de presbyterátus theológia, sed quattuor génera “proximitátis” exhíbuit Francíscus Papa, cum in Páuli sexti Aula Sympósium incíperet, cuius títulus “Ad theológiam fundamentálem sacerdótii”, quod comparávit Congregátio pro Epíscopis. Refert Rosario Tronnolone.

Deo, Epíscopo, inter presbýteros atque pópulo “proxímitas”. Hae sunt quattuor fácies quae soliditáte, re, spe presbýteros iuváre possunt eorúmque donum refovére aeque ac fecunditátem quae sacerdotális ordinatiónis die sunt pollíciti, máxime quod Dei ratiónem sequúntur, quodque potíssimum proximitátis est rátio”. Haec suum per enodátum sermónem dixit Póntifex, in quo idem quaedam iterávit, antéhac iam patefácta, praesértim in prima sua Adhortatióne apostólica Evangélii gáudium. Haec proximitátis rátio, explicávit Francíscus, sacerdóti dat cópiam adiméndi omnem saepiménti voluntátem, et remóvet item sui ipsíus comprobatiónem ac vivéndi “matrimónii detrácti” ratiónem, quandoquídem ad álios accédit ut via reperiátur quae ad veritátem vitámque ducit.

Die Mercúrii praetérito, in novíssima catechési Sancto Ioseph dicáta, títulum explicávit Póntifex, qui est “Patrónus Ecclésiae cathólicae”, Ipséque rogávit ut ea custodirétur, quemádmodum Maríae Sponsus Eam custodívit et Iesum. Audiámus Olga Sakun.

Quod in praetérita Audiéntia Generáli enuntiávit Summus Póntifex, id seriéi meditatiónum de patre putatívo Iesu finem impósuit. Ex Lítteris apostólicis Patris corde oriebántur catechéses, quas scripsit Francíscus Papa, centésimo quinquagésimo interveniénte anno a Sancto Ioseph Ecclésiae cathólicae proclamáto patróno a beáto Papa Pio nono. Francíscus planum fecit necessário Ecclésiae esse Custódem Sanctum Ioseph, quóniam Ecclésia continuátio est in história Córporis Christi, atque eádem ópera in Ecclésia matre Maríae matrem significári. Ioseph Ecclésiam custódiens, Púerum eiúsque Matrem tuéri pergit, et nos quoque Ecclésiam amántes, Púerum eiúsque Matrem amáre pérgimus. Post meditatiónem absolútam, Póntifex omnes fidéles, in Áula Páuli sexti adstántes, est cohortátus ut Sancti Ioseph se commítterent intercessióni idémque cum eis oratiónem dixit Maríae Vírginis Sponso dicátam.

(NOTÍTIAE BREVÍSSIMAE)

Per Lítteras apostólicas motu próprio datas decrévit Francíscus Papa ut Ecclesiárum locálium Ordinárii de seminariórum procuratióne, presbyterórum institutióne, catechismórum constitutióne atque áliis pártibus ágere possent, comprobatiónem Vaticánam non requiréntes, sed dumtáxat confirmatiónem. Ex his novis normis illud est quod seminárii condéndi facúltas a Sancta Sede ad dioecesánum Epíscopum ipsíus in dioecesi transfértur. Sicut in Litterárum apostolicárum motu próprio datárum exórdio definítur, est volúntas “e médio múnera salúbriter amovéndi”, ut in ecclesiáli província crebrae fiant deliberatiónes.

Haec háctenus, próxima hebdómada, Deo suffragánte, íterum ad vos.