蜜桃交友

“HEBDÓMADA PAPAE”

Notítiae Vaticánae Latíne rédditae

Die vicésimo sexto mensis Februárii anno bis millésimo vicésimo secúndo

(TÍTULI)

In Audiéntia Generáli de discrímine lóquitur Francíscus in quo Ucraína versátur: magnus – inquit – nobis est dolor. Die áltero mensis Mártii pro pace orábitur et ieiunábitur.

Senéctus dignitátem póstulat, non modo adiumentórum requirúntur consília - ait Póntifex - verum étiam exsisténtiae. 

“Nemo solus sospes evádit”: sanitátis curatóribus grátias refert Póntifex, contra virus coronárium heróicis.

Salútem plúrimam ómnibus vobis auscultántibus dicit Catharína Agorelius et bene felicitérque sit vobis audiéntibus núntios Latína lingua prolátos.

(NOTÍTIAE PRAECÍPUAE)

Audiéntiae Generáli, die Mercúrii vicésimo tértio, finem impónens, fidéles invitávit Francíscus Papa ut una simul precaréntur et ieiunárent próximo die Mercúrii Cínerum, ut in Ucraína pax redintegrarétur. Olga Sakun lóquitur.

“Die áltero mensis Mártii ad pacem obtinéndam precátio fiet et ieiúnium”: finem fáciens Audiéntiae die vicésimo tértio praetériti mensis Februárii, utrámque partem frustra implorávit Póntifex, scílicet Rússiam et Ucraínam ut quaedam reperírent ad reconciliatiónem obtinéndam, fidéles simul cohórtans ut precaréntur et ieiunárent ad pacem illis locis peténdam inítio Quadragésimae, vidélicet die áltero mensis Mártii. “Deus – asseverávit Francíscus - ómnium est Pater, non modo cuiúsdam, Ipséque nos vult fratres non hostes”. Étiam die vicésimo mensis Februárii in Salutatióne Angélica, caput Pontíficis cogitatiónum fuit quod christiáni sunt vocáti ut pacis nunc ac semper in terrárum orbe essent operatóres: est triste – áutumat Francíscus – christiános pópulos bellum inter se iníre.

In Audiéntia Generáli die tértio et vicésimo mensis Februárii novam catechésium sériem incohávit Póntifex, ad provéctam aetátem dicátam. Réttulit Alexánder de Carolis.

Série catechésium de Sancto Ioseph ad finem addúcta, Summus Póntifex novum meditatiónum cursum incépit in Audiéntia Generáli die tértio et vicésimo mensis Februárii, quae nunc ad senectútis sensum bonúmque aestimándum dicántur.

Ex Francísci corde necéssitas exstat divítias ostendéndi huius vitae aetátis, quae – áddidit – non modo “adiumentórum consíliis” índiget, verum étiam “exsisténtiae”.  Ad diálogum cohortátur Francíscus Papa inter generatiónes, unde iúvenes adiuvéntur ne confundántur et avi item ne ánimo cóncidant. Francíscus mónuit ne quis fallerétur de aetérna iuventúte ac “senum contémptu”, quod praetérito témpore “absolutórum regíminum” simulácrum hábitum est. Ad Pontíficis mentem senéctus dignitátem póstulat atque inter iúvenes et senes diálogus “humanitáti sapiéntiam” affert.

(NOTÍTIAE BREVÍSSIMAE)

Precatióne Angélica absolúta die vicésimo mensis Februárii, Natiónis diem memorávit Francíscus sanitátis operatóribus dicátum, huc addens quod “aegrotántes nos de quodam indigémus qui nos servet, qui nos ádiuvet”, tot médicos, valetudinários, voluntários, aegris sui impéndio assidéntes láudans, quorum exémplar est doctor ille qui moritúro propter coronárium virus manum ténuit.

Finis fit húius sermónis Latíni, conveniémus íterum die sábato próximo.

·         RADIO VATICANA

·         MEDIA

·         VATICANO

·         PAPA FRANCESCO