蜜桃交友

“HEBDÓMADA PAPAE”
           Notítiae Vaticánae Latíne rédditae
                         Die quinto mensis Februárii anno bis millésimo vicésimo secúndo

(TÍTULI)
Summus Póntifex: durítia quaedam est depravátio, crisis ac numeri imminúti ad renovatiónem impéllunt.
Francíscus ad saeculária Institúta: facitóte ut mundus insit in Ecclésia.
Idem Póntifex: quae in Myanmár áccidunt neglígere prorsus non debémus.

Salútem plúrimam ómnibus vobis auscultántibus núntios Latína lingua prolátos dicit Márius Galgano.

(NOTÍTIAE PRAECÍPUAE)
Francíscus Papa in papáli Basílica Sancti Petri Missam una cum totíus orbis terrárum religiósis celebrávit, Die occurrénte vitae consecrátae, qui monet: “Nolíte umquam laetítiam amíttere, ita ut stímulus inhibeátur cuiúsdam fratris sororísve feriéndi dignitátem”. Sic est éffatus Póntifex per homíliam in Missa apud Basílicam Vaticánam celebráta, die vicésimo sexto interveniénte vitae consecrátae. Lóquitur Olga Sakun.

Príncipem homíliae locum obtínuit effígies Simeónis et Annae, qui, utérque senex, Dei repromissiónem compléndam exspéctant, scílicet Messíae advéntum. Quae ipsi síngula fecérunt, ea persónis consecrátis demónstrant iter, quorum est vidére, se movére, accípere, vidére scílicet – addit Francíscus – quia Dóminus ipse “signa” mittit, consideránda quidem, ut incitémur “ad renovátum vitae consecrátae exémplar coléndum”. Ex Pontífice áliquid spei obvénit, “ut vitae consecrátae renováta effígies colátur, sine durítia, quae est gravis depravátio. Per crisim, números deficiéntes, vires senescéntes, Spíritus nos monet ut nostram vitam nostrámque communitátem renovémus. Ne dissolvámus hodiérna, hestérna respiciéntes, at nos ante Dóminum ponámus, adorántes, atque óculos postulémus qui bonum vidére váleant, et Dei vias perspícere”.

Septuagínta quinque abhic annos, die áltero mensis Februárii anno millésimo nongentésimo quadragésimo séptimo, Pius duodécimus Constitutiónem Apostólicam Próvida Mater Ecclésia evulgábat, qua hanc novam consecratiónis officiális formam in Ecclésia agnoscébat. Hac hebdómada Francíscus, in epístula quadam, “sanctam laicitátem” sodálium horum Institutórum rursus confirmávit, horum denuo recénset offícia atque núntiat eórum próximae Congressiónis ópera ad finem per se esse adductúrum. Refert Rosárius Tronnolone.

Magnam pr?videt Póntifex provocatiónem ad Institúta attinéntem, quae inter “saeculárem condiciónem et consecratiónem necessitúdinem” contíngit: quod consecráti estis, ex fácili – inquit – “religiósis aequámini”, sed “vélimus ut vestra initiális prophétia, in primis baptísmi charácter, qui saeculária laicália Institúta desígnat, vos denótet”. Baptísmum – confírmat Póntifex – cuiúsvis consecratiónis est fons, quod éfficit ut “ad Christum pertineámus” ideóque “sancti” simus. Per Baptísmum enim – aútumat Francíscus – “in communióne mansúra cum Deo et inter nos sístimus”.

(NOTÍTIAE BREVÍSSIMAE)
Mónuit Póntifex rursus de reconciliatióne in Myanmár agénda, ubi subitánea rerum convérsio superióris anni atque discrímen quod áttulit coronárium virus calamitóse hómines oeconomicámque condiciónem affecérunt.
Páucos ante dies quam Ludi hiemáles Pekíni inauguréntur, vária certámina in terrárum orbe coniúncto ac paténti magnópere exístimat Francíscus: ex athlétis inhabílibus exémplum óritur ut praeiudícia et metus posthabeántur atque ab athletárum perfugarúmque narratiónibus ánimus sumátur ad néminem deseréndum.

Quasdam res gestas bréviter narrávimus, eásdem novas próxima hebdómada.