蜜桃交友

HEBDOMADA PAPAE

Notitiae Vaticanae Latine redditae

die tricesimo octobris anno bis millesimo vicesimo primo

(30 ottobre 2021)

Póntifex ait: adest oecumenísmus cum álius álium auscúltat.

Se conférre in Cánadam vult Francíscus in adiúnctis controvérsiae de indígenis.

Iterum Francíscus: campánae pro párvulis non natis vitae Evangélium annúntient.

Felícem exóptat diem Márius Galgano ómnibus haec verba, lingua latína proláta, audiéntibus.

(REPORTAGENS)

In Audiéntia recépit Summus Póntifex Francíscus oecuménicae peregrinatiónis partícipes, sub senténtia «Cum Luthéro ad Papam», ex Germánia veniéntes, cui títulus «Mélius una simul», atque exóptat ut Ecclésia «paráta sit ad audiéndum», praecípuam occasiónem arrípiens synodális procéssus. Lóquitur Rosarius Tronnolone.

A die tértio et vicésimo ad tricésimum diem mensis Octóbris oecuménica peregrinátio suscípitur a Germánia Romam, cuius títulus «Mélius una simul». In Audiéntia cohortátur Póntifex, ut «Dei melódia audiátur» in vita, áuribus cordéque praébitis ei quod «Dóminus compósuit» pro unoquóque nostrum. «Qui dilatáto corde canit – effert Póntifex – licet fortásse ignárus, iam Dei mystérium attíngit», scílicet eius Amórem. Evéntus séquitur propósitum huic símile, quod anno bismillésimo décimo sexto actum est, cuius idem títulus «Cum Luthéro ad Papam», ipsúmque peráctum ad quingentésimum anniversárium Lutheránae reformatiónis parándum. Quod proposuérunt Offícium de Ópera pastoráli pro Iuventúte dioecésis Magdeburgénsis atque Offícia de Ópera pastoráli pro Infántia et Iuventúte Ecclésiae evangélicae in Germánia mediána atque Ecclésiae evangélicae Anhaltinénsis.

Summus Póntifex dixit se esse parátum ad invitatiónem recipiéndam Episcopórum Canadénsium, qui óperam dant, ut reconciliatiónis cum natívis procéssus incédat. Visitatiónis dies próxime officióse nuntiabúntur. Compósuit Olga Sakun.

Iam precatiónis tempore Salutatiónis Angélicae diéi sexti praetériti mensis Iúnii cum adstántibus Francíscus communicávit ánimi sui perturbatiónem de funéstis dirísque núntiis quibúsdam superióribus hebdómadis elátis. Cathólica schola, quae ánglico nómine Kamloops Indian Residential School appellátur, locus facta est immánis facínoris, cum in vicíniis fóvea quaédam commúnis repérta est, in qua ducentórum nativórum Canadénsium córporum relíquiae condebántur, quod praeteritárum iteratárum atrocitátum osténdit testimónium. Quibus detéctis, «mea culpa» statim ab Epíscopis Américae Septemtrionális enuntiáta est ac complúra propósita ad indígenas communitátes fulciéndas sunt suscépta, procéssu interpósito reconciliatiónis, cuius fastígium est desidérium patefáctum Pontíficis Cánadae peténdae, «cuius tempus deínceps statuétur», ut Sedes Vaticána Diurnáriis Edocéndis prótulit.

(NEWS)

Peregrínis Polónis dicens salútem, exeúnte Audiéntia Generáli, Póntifex mémorat se campánas benedixísse, quarum est nomen «Vox non natórum» quaeque Aequatóriae et Ucraínae destinántur.

In Audiéntia Generali lóquitur Póntifex de temptatióne «“novórum religiónis fundamentórum propugnatórum» christiánam vitam intra praeceptórum sériem praesaepiéndi, in quibus secúritas quaéritur, pótius quam libértas et Dei amóris novitátes petántur, qui unus in humána vita dona defert pacis ac laetítiae.

Haec háctenus, próxima hebdómada rursus ad vos.