ÃÛÌÒ½»ÓÑ

Pope

"Maturéscit fides, si Deus médium óccupat locum, non autem necessitátes nostrae". Hic est in primis núntius Pontíficis Francísci meditatiónis in precatióne Salutatiónis Angélicae die domínico recitáta.

Audiéntiae Generáles dénuo in Pauli VI Aula post aestívum intervállum redintegrántur. Francíscus quaedam praébuit meditánda ex epístula sancti Pauli ad Gálatas.

Summus Póntifex íterum voluntátem osténdit Líbani visitándi, anno elápso a deflagratióne in portu Beryténsi.

Felícem exóptat diem Philíppus Herrera-Espaliat ómnibus haec verba, língua Latína proláta, audiéntibus.

(NOTITIAE PRAECIPUAE)

Vínculis cum Deo adstríngimur gratúito, non ex cómmodo. Quod perspícue, ad mentem Pontíficis, pretéritae diéi domínicae Evangélium docet, innúmeris fidélibus enarrátum, qui merídie in Civitátem Vaticánam pervenérunt ad Salutatiónem Angélicam precándam. Omnia refert Andréas De Angelis:

Cur Dóminum requírimus? Quae sunt fídei nostrae ratiónes? Haec quaesívit Francíscus Papa a fidélibus in Foro Petriáno adstántibus, post Evangélium domínicae memorátum, quod hóminum multitúdinem Iesum quaeréntem osténdit. Ex hac cogitatióne Póntifex argumentátur requírere Deum non suffícere, sed causam investigándam esse cur ipse requirátur, alióquin – áddidit Francíscus – in temptatiónem cádere póssumus idóla colendi Deum tantum ad usum commodúmque nostrum perquiréntes, ad quaestiónes solvéndas, ad ea adipiscénda per Eum, quae soli obtinére non valémus, ítaque ex ambitióne. Fides sic exílis manet, cum príncipem locum non obtíneat Deus, sed nostrae necessitátes. Fides autem matúra – cohortátus est Francíscus – Iesum in vitam admíttere studet, ad amóris históriam experiéndam cum Eo, qui amóris necessitúdinem a nobis póstulat. Ad Pontíficis mentem mos hic nos ádiuvat, ne Deo utámur neque réliquis homínibus.

In Pauli VI Aula partim fidélibus stipáta, Audiéntias Generáles redintegrávit Francíscus Papa post aestívum intervállum, meditatiónes révocans de epístula sancti Pauli ad Gálatas, christiánam scílicet communitátem in discrímine versántem. Attamen, sicut in catechési explicávit Póntifex, Apóstoli núntius perválidus manet, etiam quod ad hodiérnam Ecclésiam ‘attinet.

Audiámus Alexándrum De Carolis:

In loco, quem commentátus est Francíscus Papa, Paulus Apóstolus suam osténdit lamentatiónem, animadvértens Gálatas, quibus Iesum Christum nuntiáverat, perículum adíre a veritáte recedéndi, áliud Evangélium recipiéntes, a nonnúllis novis missionáriis praedicátum. In epístula ad illam communitátem míssa, Paulus confírmat Evangélium unum esse et illud esse quod kérygma fert, id est núntium mortis et resurrectiónis Iesu, fontis salútis.

(NOTITIAE BREVISSIMAE)

Iterum públice voluntátem suam manifestávit Póntifex Líbanum visitándi, quae Nátio est Médii Oriéntis postrémis tempóribus magno político oeconomicóque discrímine affécta. Summus Póntifex, Audiéntiae Generáli féria quarta praetérita finem impónens, id enuntiávit, suam osténdens proximitátem cuncto Libanénsi pópulo, anno elápso a gravi deflagratióne in portu Beryténsi, quae die quarto mensis Iúlii anno bis millésimo vicésimo áccidit et plus quam ducéntos hómines interémit, complúres sauciávit ac multa vastávit.
Haec hactenus, proxima hebdomada, Deo iuvante, conveniemus.