蜜桃交友

“HEBDOMADA PAPAE”

Notitiae Vaticanae Latine redditae

Die 26 (vicésimo sexto) mensis Iúnii anno 2021

(bis millésimo uno et vicésimo)

(TITULI)

Per núntium primi Diéi mundiális avórum ac senum Francíscus scríbit: ad nostram solitúdinem solándam Deus mittit ángelos.

In Generáli Audiéntia novam catechésis sériem íncipit Summus Póntifex qui de christiána communitáte lóquitur ex épistula ad Gálatas háuriens mónita.

De Myanmár quaedam dicit Póntifex: prorsus deflénda est profugórum condício; pax rédeat.

Salútem plúrimam Catharína Agorélius dicit ómnibus vobis auscultántibus núntios Latína língua prolátos. Vos rediísse laetámur.

(NOTITIAE PRAECIPUAE)

Per núntium primi Diéi mundiális avórum ac senum, qui die quínto et vicésimo mensis Iúlii celebrábitur, Francíscus Papa tértiam aetátem quae dícitur magni facit, cúius est munus “fidem iuvénibus transmitténdi”. Indulgéntia plenária tribuétur ei qui celebratiónem illíus diéi participáverit. Lóquitur Rosárius Tronnolóne.

Vélimus ut quísque avus ángelum se visitántem récipiat: haec verba scríbit Francíscus Papa suo in núntio primi Diéi mundiális avórum ac senum, qui die quínto et vicésimo mensis Iúlii celebrábitur, ex memória avi Iesu, sancti Ióachim, qui amótus est a communitáte quippe qui fíliis caréret. Suum per núntium, duplicátum per instruméntum televisíficum, osténdit “quómodo his pestiléntiae ménsibus, Dóminus ángelos míttere pergat” ad hómines in solitúdine versántes, illud iteratúrus: ‘Ego tecum sum ómnibus diébus’”. Monet praetérea avos ut “nepótibus” Evangélium núntient. Illo Mundiáli Die ómnibus sacrae litúrgiae particípibus indulgéntia plenária tribúitur.

Cursu exácto duodequadragínta catechésium, in Audiéntia Generáli die vicésimo tértio praetériti mensis Iúnii Summus Póntifex currículum incohávit meditatiónis epístulam ad Gálatas complecténtis, planum fáciens quemádmodum epístulae arguménta ad hodiérna témpora respóndeant. Compósuit Mónia Parénte.

Novam catechésis sériem íncipiens, in Audiéntia Generáli die vicésimo tértio mensis Iúnii, de quibúsdam praecípuis fídei arguméntis, quae in epístula sancti Páuli ad Gálatas reperiúntur, Francíscus similitúdinem descrípsit quae inter hodiérnam condiciónem et primórum christianórum Galátiae intercédit. Epístula haec – argumentátur Summus Póntifex – reférri vidétur ad nostros dies, quóniam de illis lóquitur qui se éxhibent “veritátis possessóres”, ad opus detrectándum ab áliis actum ideóque ad communitátem dividéndam. Póntifex ígitur hortátur ut sémita teneátur “quae líberat et semper est nova Iesu Christi Crucifíxi et Resuscitáti”, quam géntium Apóstolus significávit.

(NOTITIAE BREVISSIMAE)

Precatióne, quae est Ángelus Dómini, recitáta, die vicésimo mensis Iúnii, Summus Póntifex de multitúdine profugórum in Myanmár est locútus atque idem mónuit quod illíus loci Epíscopi, ut currícula humanitátis servéntur et loca perfúgii nullíus partis. Francíscus Díem Mundiálem Pérfugae memorávit, eódem die celebrátum, adhórtans simul “ad cor aperiéndum” homínibus bellum, violéntias ac paupertátem fugiéntibus.

Haéc háctenus, próxima hebdómada rursus conveniémus.