蜜桃交友

“HEBDOMADA PAPAE”

Notitíae Vaticánae Latíne rédditae

Die vicésimo séptimo mensis Februárii anno bis millésimo uno et vicésimo

(TÍTULI)

Maeror Papae pro víctimis petitiónis in Congo occísis.
Adémptio armamentórum haud finis eligíbilis, sed vínculum éthicum est.
Proféssor Bernabei est novus médicus peculiáris Papae.

Salútem plúrimam ómnibus vobis auscultántibus dicit Márius Galgano et felíciter vobis audiéntibus núntios Latína lingua prolátos.

Ascolta il nostro radiogiornale in lingua latina

(NOTÍTIAE PRAECÍPUAE)

Papa Francíscus patefácit telegrámmate dolórem suum ob interneciónem oratóris extraordinárii Itáliae, carabinárii de custódia et autocinetístae ágminis cúrruum, qui a defectóribus oppugnáti sunt. Refert nobis Rosárius Tronnolone.

Póntifex patefácit maerórem suum familiáribus victimárum, scílicet iúvenis oratóris extraordinárii Itáliae Lucae Attanasio, carabinárii trigínta annos nati agéntis Victórii Iacovacci et autocinetístae eórum Congénsis Mustáphae Milambo. In núntii verbis quae Papa convértit ad Corpus Diplomáticum ac telum carabinariórum exprímit cordólium “ob óbitum horum ministrórum pacis iustiti?que”. Ipse recordátur ínsuper “testimónium singuláre oratóris extraordinárii, viri conspícuis virtútibus humánis et christiánis excelléntis, semper benévoli in fratérnis et cordiálibus necessitudínibus conecténdis, in restituéndo serénas concordésque relatiónes in hac Natióne Africána”; item láudat “testimónium carabinárii, períti et magnánimi in múnere suo expléndo ac paráti ad novam famíliam constituéndam”.

In núntio televisífico Secretárii pro Relatiónibus cum Státibus dirécto ad supérnum convéntum Sessiónis anni bis millésimi vicésimi primi Conferéntiae de ademptióne armórum Genévae, pervénit cohortátio Sanctae Sedis ad stúdium ut defíniat consénsus duratúros in via pacis: “Nemo in tuto est, donec non omnes in tuto sint”. Agit Olga Sakun.

Magnum moméntum ademptiónis armórum perspícuum est in adiméndis armis atómicis, biológicis et chímicis, sed “eádem ratióne veheménter áttinet étiam ad augescéntem concúrsum militárem in spátio et in rebus spátii electrónici ac intellegéntiae artificiális, sicut systémata armórum liberórum letálium”. Centrális est haec agnítio in allocutióne Archiepíscopi Páuli Richárdi Gallagher, Secretárii pro Relatiónibus cum Státibus, proláta in supérno convéntu Sessiónis anni bis millésimi vicésimi primi Conferéntiae de ademptióne armórum Genévae. Contúitus ergo Sanctae Sedis ampléctitur cunctam disceptatiónem apparandórum armórum et fovet propósitum quod cóngruit cum máximis desidériis cordis humáni, scílicet vivéndi in pace, securitáte, stabilitáte, dum – notat Praesul – “húius témporis áër mútuae diffidéntiae atque erósio multilateralísmi ímpedit conátus” in hac parte.

(NOTÍTIAE BREVÍSSIMAE)

Robértus Bernabei, ex Túscia, Floréntiae natus die vicésimo quarto mensis Ianuárii anno millésimo nongentésimo quinquagésimo áltero, hódie est proféssor ordinárius medicínae intérnae et medicínae senectútis Universitátis Cathólicae Sacratíssimi Cordis Romae. Papa Francíscus eum nominávit suum médicum peculiárem, post mortem professóris Fabrícii Soccorsi, qui die nono mensis Ianuárii hoc anno óbiit ob implicatiónes coniúnctas cum viro coronário.

Finis fit húius editiónis, conveniémus íterum próxima hebdómada.