Саміт у Ватыкане: лідары свету аб'ядналіся для абароны дзяцей
Аляксандр Амяльчэня - Pope
Сустрэча Любіць і абараняць дзяцей, якая прайшла у Апостальскім палацы, сабрала шырокае кола ўдзельнікаў – ад лаўрэатаў Нобелеўскай прэміі да кіраўнікоў гуманітарных арганізацый.
Былы віцэ-прэзідэнт ЗША Эл Гор падкрэсліў, што экалагічны крызіс стаў цяжкім цяжарам для будучых пакаленняў. Ён заклікаў да глыбокіх змен у эканамічных і палітычных сістэмах, якія павінны паставіць экалагічную і сацыяльную справядлівасць у цэнтр усіх намаганняў.
Вялікі канцлер Мальтыйскага Ордэна Рыкарда Патэрно дзі Мантэкупа прадставіў трывожную статыстыку: 473 мільёна дзяцей закранутыя канфліктамі. Ён падрабязна распавёў пра дапамогу Мальтыйскага Ордэна, у тым ліку пра дастаўку 300 тон харчовай дапамогі ў Газу і працу шпіталя ў Бэтлееме.
Прэзідэнт Форума сямейных асацыяцый Адрыяна Бардзіньён звярнуў увагу на праблему дэмаграфічнага крызісу і неабходнасць абароны дзяцей ад небяспек лічбавага свету. Ён заклікаў да стварэння комплекснай сістэмы падтрымкі сем'яў.
Дырэктар Save the Children Даніэла Татарэла нагадала пра гістарычную Дэкларацыю правоў дзіцяці 1924 года і падкрэсліла неабходнасць актыўных дзеянняў для абароны дзяцей.
Былы прэм'ер-міністр Італіі Марыа Драгі падкрэсліў ключавую ролю адукацыі ў абароне дзяцей і нагадаў пра інвестыцыі ў дзіцячыя сады і поўны школьны дзень у межах Нацыянальнага плана аднаўлення.
Кранальным стаў выступ сенатара Ліліяны Сегрэ, якая заклікала не забываць пра пакуты ўсіх дзяцей, незалежна ад іх паходжання і веравызнання: "Калі б мы падтрымлівалі толькі некаторых дзяцей, забываючы пра іншых, мы б здрадзілі ім".
Міністр замежных спраў Італіі Антоніа Таяні абвясціў канкрэтныя меры, у тым ліку праект па перавозцы ў Італію трыццаці хворых на рак дзяцей з Газы, а таксама праграму Food for Gaza. Ён падкрэсліў важнасць пераўтварэння Міжземнага мора з "могілак нявінных" у "мора міру".
Паводле даных ЮНІСЕФ, якія прадставіў Андрэа Якаміні, у 2025 годзе 213 мільёнаў дзяцей у 146 краінах будуць мець патрэбу ў гуманітарнай дапамозе. Каля мільярда дзяцей жывуць у краінах з высокай рызыкай уплыву кліматычных змен, а 50 мільёнаў з'яўляюцца перамешчанымі асобамі з прычыны канфліктаў, насілля і прыродных катастроф.
