Пантыфік едзе ў Манголію, бо ў Касцёле колькасць не мае значэння
Тэкст: Андрэа Тарніелі / Пераклад і адаптацыя: Аляксандр Панчанка / Pope
“Папа Францішак збіраецца ў Манголію. Гэта “доўгачаканы” візіт, які таксама быў у няздзейсненых планах святога Яна Паўла ІІ, пасля таго як на пачатку 1990-х гадоў прысутнасць місіянераў адрадзіла там хрысціянскую супольнасць. Касцёл, які Наступнік святога Пятра абдыме ў сэрцы Азіі, “невялікі па колькасці, але напоўнены верай і міласэрнай любоўю”. Францішак сустрэнецца не толькі з 1500 католікамі краіны, але і з усім гэтым “высакародным” і “мудрым” народам, з яго вялікай будысцкай традыцыяй”, - заўважыў галоўны рэдактар СМІ Святога Пасаду.
“Чаму Папа едзе ў Манголію? Чаму ён прысвячае пяць дзён сваёй праграмы (два дні на дарогу і тры на прабыванне) наведванню такой невялікай групы католікаў? Ці мае да гэтага дачыненне “геапалітыка”, бо гаворка ідзе пра паездку ў краіну, якая мяжуе з Расійскай Федэрацыяй і Кітайскай Народнай Рэспублікай? У рэчаіснасці прычына пілігрымкі на перыферыю Азіі не мае ніякага “геапалітычнага” падтэксту”, - напісаў Тарніелі, дадаючы, што геапалітыка не з’яўляецца прэрагатывай пантыфікату Хорхэ Марыа Бэрголіа.
“У панядзелак 30 лістапада 1970 года святы Павел VI здзейсніў доўгае падарожжа ў Самоа ў Ціхім акіяне. Падчас святой Імшы ў пасёлку Леўлумаега-Туай, на паўночна-заходнім узбярэжжы вострава Уполу, Папа Манціні адмовіўся ад урачыстага “мы”, які тады выкарыстоўвалі Папы, і сказаў: “Мяне прывялі да вас не любоў да падарожжаў ці нейкая цікаўнасць: я прыехаў, бо мы ўсе браты, а дакладней, таму што вы – мае сыны і дачкі, і будзе правільна, каб я, як бацька сям’і, гэтай сям’і, якой з’яўляецца Каталіцкі Касцёл, паказаў кожнаму з вас, што вы маеце права на такую самую любоў. Ведаеце, што значыць “Каталіцкі Касцёл”? – Гэта значыць, што ён для ўсяго сусвету, што ён для ўсіх, што ён не бывае чужым нідзе: кожны чалавек, незалежна ад нацыянальнасці, узросту ці выхавання, мае месца ў ім”, - нагадаў словы Паўла VI Андрэа Тарніелі.
“Касцёл – гэта месца для ўсіх. Касцёл, дзе прыярытэтам не з’яўляецца колькасць, дзе ніхто не з’яўляецца чужынцам, да якой бы мовы, культуры, народу ці нацыі ён не належаў. Гэта Касцёл “para todos”, для ўсіх, пра які Францішак казаў у Лісабоне. Менш чым праз месяц пасля СДМ Біскуп Рыма зноў адпраўляецца ў дарогу, кажучы сваім “мангольскім братам і сёстрам”, што ён “шчаслівы шчаслівы здзейсніць падарожжа, каб быць сярод іх як брат усім”, - завяршыў сваё разважанне галоўны рэдактар ватыканскіх СМІ.
