Арцыбіскуп Генсвайн: Францішак падтрымаў Бэнэдыкта XVI
Аляксандр Амяльчэня - Pope
“Бэнэдыкт XVI атрымаў прыгожы ліст ад Францішка, дзе ён выступае як пастыр, як сабрат, а таксама як чалавек, яшчэ раз выказваючы поўны давер, поўную падтрымку і малітву”, - адзначыў іерарх.
У інтэрв'ю, якое выйшла 9 лютага 2022 года ў 20.00 у эфіры праграмы TG1 асабісты сакратар Папы-эмерыта спаслаўся на крытыку ліста Бэнэдыкта XVI з боку нямецкай прэсы. “Тыя, хто прачытаў ліст сумленна, так, як ён быў напісаны, не могуць падзяляць гэтай крытыкі і абвінавачванняў. Ён просіць прабачэння ва ўсіх ахвяр злоўжыванняў”, - падкрэсліў ён.
Арцыбіскуп Генсвайн нагадаў, што падчас Крыжовага шляху ў 2005 годзе Ян Павел ІІ папрасіў кардынала Ратцынгера напісаць медытацыю, якая ўключыла знакамітую стацыю, дзе гаворка ідзе пра бруд у Касцёле. “Такім чынам, ёсць дзеянні, ёсць дакументы, ёсць доказы таго, што кардынал Ратцынгер, Бэнэдыкт XVI, зрабіў шмат, многае, вельмі многае ў гэтай далікатнай сферы ў напрамку ўнутранага ачышчэння”, - звярнуў увагу нямецкі іерарх.
Спасылаючыся на сцвярджэнне мюнхенскай юрыдычнай фірмы, якая рыхтавала даклад, што чарговыя арцыбіскупы “не маглі не ведаць” аб злоўжываннях, Генсвайн заўважыў, што юрыстамі не было прапанавана ніякіх доказаў у падтрымку гэтага вельмі сур’ёзнага абвінавачвання. Не нармальнай з’яўляецца сітуацыя, калі чалавек павінен даказваць сваю невінаватасць у адсутнасць доказаў.
