Мусульманская Інданезія развівае каталіцкі турызм
Ян Глінскі
У часопісе The Jakarta Post апублікавана справаздача, у якой указваецца на значэнне хрысціянства для развіцця эканомікі на востраве Флорэс.
Як адзначыў міністр турызму Інданезіі, хоць гэта самая вялікая мусульманская краіна ў свеце, аднак адносіны з хрысціянскай меншасцю і вызнаўцамі іншых рэлігій тут вельмі добрыя. Сандзіяга Уна нагадаў таксама, што інданезійцы многім абавязаны Касцёлу: католікі рэалізуюць у гэтай краіне шматлікія праекты ў сферы адукацыі, медыцыны і дабрачыннасці.
З мэтай развіцця эканомікі міністэрства турызму Інданезіі прыняло рашэнне ўключыць у каляндар нацыянальных турыстычна-культурных мерапрыемстваў таксама каталіцкія фестывалі і іншыя важныя падзеі ў Касцёле, як напрыклад, фестываль хрысціянскай культуры і мясцовых традыцый у Лабуан-Баджо або святкаванне Вялікага тыдня ў горадзе Лурантука, куды ў 2023 годзе прыбыла больш за 23 тысячы пілігрымаў, і не толькі з Інданезіі.
Біскуп Сіпрыянус Хормат, які нясе служэнне ў дыяцэзіі Рутэнг на востраве Флорэс, заўважыў, што турызм павінен быць закаранёны ў мясцовай культуры і духоўнасці: “Турызм з’яўляецца формай пілігрымкі, крочаннем па слядах Бога ў радаснай сустрэчы чалавецтва і сусвету”.
Першыя каталіцкія мерапрыемствы, уключаныя ў турыстычны каляндар Інданезіі, датычаць менавіта вострава Флорэс, дзе пражывае 1,8 мільёна жыхароў, і амаль усе яны вызнаюць каталіцтва. Усяго хрысціяне складаюць каля дзесяці працэнтаў з 275 мільёнаў жыхароў Інданезіі.
Як паведамлецца ў інданезійскіх СМІ, дадзенае рашэнне Міністэрства турызму можа стаць чарговым крокам да лепшага сацыяльнага прыняцця хрысціян у гэтай краіне. Нагадаем, на Вялікдзень 2024 года мясцовыя мас-медыя паведамілі аб афіцыйным выкарыстанні ў Інданезіі імені Езус Хрыстус для абазначэння цэнтральнай постаці хрысціянства. Раней выкарыстоўваўся запазычаны з мусульманскай традыцыі тэрмін Іса аль-Масіх (Месія). Пра гэтую змену абвясціў прэзідэнт Джока Відода яшчэ ў канцы 2023 года.
У верасні сталіцу Інданезіі наведае Папа Францішак. У 1970 годзе туды пілігрымаваў Папа Павел VI, а ў 1989 годзе гэты архіпелаг наведаў святы Ян Павел ІІ.
