У старажытным сэрцы Рыма з’явіцца археалагічная пешаходная зона
Ян Глінскі
2 красавіка 2024 года адміністрацыя горада Рыма прадставіла план, паводле якога набярэжная злучыць асноўныя археалагічныя помнікі ў цэнтры Рыма: Імператарскі форум, Калізей, тэрмы Каракалы, пагоркі Цэлій, Палацін і Капітолій, а таксама Вялікі цырк.
У горадзе падлічылі, што праект будзе каштаваць 18,8 мільёнаў еўра. Пачатак будаўніцтва запланаваны на верасень.
Па словах мэра Рабэрта Гуальцьеры, у будучыні пешаходам і веласіпедыстам больш не трэба будзе дзяліць дарогі з аўтамабілямі і аўтобусамі. “Аднак гэта будзе магчыма толькі пасля падаўжэння лініі метро С”, – удакладніў палітык. З чэрвеня 2034 года яно будзе злучаць цэнтральную плошчу Венецыі з Калізеем і Імператарскім форумам.
У першую чаргу будуць пашыраны тратуары, з’явяцца пешаходныя зоны і веладарожкі. Прадугледжаны зялёныя зоны, а таксама месцы для сядзення і адпачынку з выглядам на форум. Мэр Гуальцьеры мае надзею, што частка будаўнічых работ будзе завершана да пачатку Юбілейнага 2025 года. Аднак гэта будзе залежаць ад ходу іншых будаўнічых работ у Рыме.
Праект набярэжнай з’яўляецца адным са шматлікіх планаў рэканструкцыі горада. Да Юбілейнага года мадэрнізуецца, між іншым, тэрыторыя вакол Ватыкана. У будучым пешаходная зона злучыць базыліку Святога Пятра і Кастэль Сан-Анджэла. Для гэтага зараз будуецца тунэль для аўтатранспарту.
Святы (Юбілейны) год арганізоўваецца Каталіцкім Касцёлам у Рыме і Ватыкане кожныя 25 гадоў. 24 снежня 2024 года папа Францішак абвесціць аб распачацці Юбілейнага 2025 года.
