Папа заклікаў да аднаўлення экспарту ўкраінскага збожжа
Аляксандр Амяльчэня - Pope
30 ліпеня 2023 года, завяршаючы сваю сустрэчу з вернікамі на плошчы святога Пятра, Францішак заклікаў працягваць маліцца за “змучаную Украіну, дзе вайна нішчыць усё, нават збожжа”.
“Гэта цяжкае злачынства супраць Бога, таму што зерне – гэта Яго дар, каб накарміць чалавецтва, а плач мільёнаў братоў і сясцёр, якія пакутуюць ад голаду, узносіцца да нябёсаў. Я звяртаюся да маіх братоў, да ўлад Расійскай Федэрацыі, каб Чарнаморская ініцыятыва аднавілася, і збожжа можна было бяспечна перавозіць”, - сказаў Пантыфік.
4 жніўня 2023 года споўніцца тры гады з моманту разбуральнага выбуху ў порце Бейрута. Францішак заклікаў да “малітвы за ахвяр і іх сем’і, якія змагаюцца за праўду і справядлівасць”. “Няхай комплексны крызіс у Ліване знойдзе рашэнне, годнае гісторыі і каштоўнасцей гэтай нацыі. Не будзем забываць, што Ліван – гэта яшчэ і пасланне”, - адзначыў ён.
Францішак папрасіў падтрымаць яго малітвамі падчас апостальскага падарожжа ў Партугалію на Сусветныя дні моладзі. Ён адправіцца туды ў бліжэйшую сераду, 2 жніўня 2023 года.
“Многія маладыя людзі з усіх кантынентаў адчуюць радасць сустрэчы з Богам і сваімі братамі і сёстрамі, якіх вядзе Панна Марыя, што пасля Звеставання “ўстала і паспешліва пайшла” (Лк 1, 39). Ёй, ззяючай Зорцы хрысціянскага шляху, якую вельмі шануюць у Партугаліі, я даручаю пілігрымаў Сусветных дзён і ўсю моладзь свету”, - звярнуўся Папа.
