ААН: місія Святога Пасада заклікала адмяніць смяротнае пакаранне
Аляксандр Амяльчэня - Pope
Арцыбіскуп Габрыэле Кача адзначыў, што ватыканская пазіцыя грунтуецца на абароне непарушнай годнасці чалавечай асобы і ролі законнай улады ў абароне агульнага дабра грамадства. Ён падкрэсліў, што злачынец ніколі не страчвае годнасці чалавечай асобы.
Сёння, з улікам удасканалення сістэм выканання пакарання, існуе дастаткова мер для аховы грамадскага парадку і бяспекі людзей без прымянення смяротнага пакарання. Тым больш, што прымяненне такой меры цалкам выключае выпраўленне памылак, дапушчаных судовай сістэмай.
“Апостальская Сталіца лічыць, што абарона права на жыццё на ўсіх яго этапах з’яўляецца неабходнай для адказнага кіравання, і заклікае ўсе дзяржавы заняць паслядоўную пазіцыю адносна прыярытэту і абароны чалавечага жыцця і павагі да годнасці чалавека, незалежна ад учыненага ім злачынства. Мужнасць у гэтым плане, уключаючы прынамсі мараторый на прымяненне смяротнага пакарання ў якасці канкрэтнага кроку да яго ўсеагульнай адмены, дазволіць нам засяродзіцца на пашырэнні нашых намаганняў па абароне кожнага чалавека”, - сказаў Пастаянны прадстаўнік Святога Пасада ў Арганізацыі Аб'яднаных Нацый.
