Святы Айцец заклікаў супрацьстаяць нянавісці і насіллю
“У гэтыя дні, боль ад войнаў і канфліктаў, якія працягваюць прыгнятаць чалавецтва, стаў яшчэ большым пасля навіны пра шматлікіх ахвяр жудаснага нападу на дзве мячэці ў Крайстчэрч, у Новай Зеландыі. Я малюся за загінулых і параненых, а таксама за іх сем’і”, - сказаў Францішак пасля малітвы “Анёл Панскі”.
Папа выказаў сваю блізкасць да мусульманскай і грамадзянскай супольнасці і скіраваў запрашэнне далучыцца да малітвы і мірных жэстаў, каб супрацьстаяць нянавісці і насіллю.
15 сакавіка 2019 г. у двух мячэцях новазеландскага горада Крайстчэрч некалькі чалавек адкрылі стральбу па вернікам. Загінулі і былі параненыя дзясяткі чалавек.
Два дні таму Святы Айцец накіраваў тэлеграму пастыру мясцовай дыяцэзіі ў якой запэўніў у сваёй малітве за ахвяр “бессэнсоўных актаў насілля”, як ён назваў напады на мусульманскія храмы.
