Святы Айцец моліцца за ахвяр канфліктаў і няшчасных выпадкаў
Пантыфік згадаў Баліварыянскую Рэспубліку падчас нядзельнай малітвы “Анёл Панскі” ў сувязі з эскалацыяй барацьбы за ўладу ў гэтай краіне. “У гэты час я асабліва блізкі да народа Венесуэлы і малюся за справядлівае, мірнае рашэнне”, - сказаў ён.
Таксама ў сваім пасце на Twitter Францішак узгадаў венесуэльцаў, якія перажываюць драматычны момант сваёй гісторыі. “Тут, у Панаме, я шмат думаў пра венесуэльскі народ, з якім у гэтыя дні яднаюся асаблівым чынам. З прычыны сур’ёзнай сітуацыі, у якой апынулася краіна, запрашаю вас маліцца, каб рэалізавалася справядлівае і мірнае ўрэгуляванне”.
Падчас нядзельнай малітвы ў Доме Міласэрнага Самараніна ў прыгарадзе сталіцы Панамы, Папа памаліўся таксама за мір у Калумбіі. Ён прачытаў імёны ўсіх загінулых у Багаце маладых мужчын і жанчын, якія хацелі прыняць удзел у Сусветных днях моладзі.
Пантыфік таксама ўзгадаў ахвяр прарыву плаціны на шахце жалезнай руды на ўсходзе Бразіліі і асоб, якія загінулі ў выніку выбуху на нафтаправодзе ў Мексіцы. Ён выказаў свае спачуванні сем’ям і паабяцаў маліцца за ўсіх, хто пацярпеў.
