Папа: трэцяя гадавіна вайны ва Украіне – боль і ганьба чалавецтва
Аляксандр Панчанка - Pope
Святы Айцец у першую чаргу звярнуўся да дыяканаў, якія прымалі ўдзел у юбілейнай сустрэчы з нагоды Святога года, а таксама да тых, хто раніцай у ватыканскай базіліцы атрымаў пасвячэнне ў дыяканат.
“Дарагія браты дыяканы, вы прысвячаеце сябе абвяшчэнню Божага слова і міласэрнаму служэнню, выконваеце вашу паслугу ў Касцёле словамі і справамі, нясучы Божую любоў і міласэрнасць усім. Заклікаю вас працягваць з радасцю ваш апостальскі шлях і – як падказвае нам сённяшняе Евангелле – быць знакам любові, якая ахоплівае ўсіх, якая ператварае зло ў дабро і стварае братэрскі свет. Не бойцеся рызыкаваць дзеля любові!”, - заахвоціў Папа.
Пантыфік нагадаў, што працягвае праходзіць лячэнне, часткай якога з’яўляецца адпачынак. Ён выказаў падзяку ўрачам і медыцынскім работнікам за клопат пра яго і самаахвярнасць, з якой яны выконваюць сваё служэнне сярод хворых людзей.
“Заўтра спаўняецца трэцяя гадавіна шырокамаштабнай вайны супраць Украіны: балючая і ганебная дата для ўсяго чалавецтва! Узнаўляючы сваю блізкасць да змучанага ўкраінскага народа, заклікаю вас памятаць пра ахвяр усіх узброеных канфліктаў і маліцца аб дары міру ў Палесціне, Ізраілі і на ўсім Блізкім Усходзе, у М’янме, Ківу і Судане”, - заклікаў Святы Айцец.
Францішак заўважыў, што атрымаў шмат цёплых паведамленняў і быў асабліва крануты лістамі і малюнкамі дзяцей. “Дзякую за гэтую блізкасць і за малітвы падтрымкі, якія я атрымаў з усяго свету! Даручаю ўсіх заступніцтву Марыі і прашу вас маліцца за мяне”, - напісаў Папа.
