Папа прапануе G20 скараціць выдаткі на зброю і бароцца з голадам
Аляксандр Амяльчэня - Pope
У пасланні да прэзідэнта Бразіліі Луіса Інасіу Лулы да Сілвы, які старшынствуе ў Вялікай дваццатцы, Папа падкрэсліў неабходнасць тэрміновых дзеянняў па выкараненні голаду і беднасці ў свеце.
Святы Айцец адзначыў, што сучасныя ўзброеныя канфлікты не толькі прыводзяць да шматлікіх ахвяр і экалагічных праблем, але і ўзмацняюць голад і беднасць як у зонах канфліктаў, так і за іх межамі. Ваенныя дзеянні працягваюць аказваць значны ўплыў на нацыянальныя эканомікі, асабліва з прычыны велізарных сум, якія выдаткоўваюцца на зброю.
Францішак звярнуў увагу на парадаксальную сітуацыю ў свеце: больш за 3 мільярда людзей не маюць доступу да паўнавартаснага харчавання, у той час як амаль 2 мільярда пакутуюць ад атлусцення. Ён падкрэсліў, што праблема голаду – гэта не проста недахоп ежы, а вынік больш шырокай сацыяльнай і эканамічнай несправядлівасці. На планеце вырабляецца дастаткова ежы для ўсіх людзей, але яна няроўна размяркоўваецца, а значная частка штодня выкідваецца.
Святы Айцец прапанаваў стварыць Глабальны альянс супраць голаду і беднасці, які мог бы пачаць сваю дзейнасць з рэалізацыі даўняй прапановы Святога Пасада аб пераразмеркаванні сродкаў з ваенных выдаткаў на развіццё найбяднейшых краін.
На думку Папы, такі падыход дапаможа прадухіліць сітуацыі, калі грамадзяне гэтых краін вымушаныя звяртацца да гвалтоўных рашэнняў або пакідаць Радзіму ў пошуках больш годнага жыцця.
Францішак таксама падкрэсліў важнасць устойлівых харчовых сістэм, якія павінны быць экалагічна бяспечнымі і карыснымі для мясцовых супольнасцей. Ён заклікаў да комплекснага і шматбаковага падыходу ў вырашэнні гэтых праблем, адзначыўшы, што кароткатэрміновыя рашэнні недастатковыя з улікам маштабу і геаграфічнага ахопу праблемы.
У заключэнні Папа падкрэсліў, што Святы Пасад працягне прасоўваць годнасць чалавека і ўносіць свой уклад у агульнае дабро праз дзейнасць каталіцкіх устаноў па ўсім свеце. Ён заклікаў планаваць і рэалізоўваць праекты ў адпаведнасці з патрэбамі людзей і грамадства, а не навязваць іх зверху ці праз арганізацыі, якія шукаюць толькі ўласную выгаду.
