Пантыфік падзякаваў лаўрэатам Прэміі Заіда
Марыя Валодзіна – Pope
“У гэтыя гады мы ішлі разам як браты і сёстры, памятаючы пра тое, што, паважаючы нашы культуры і традыцыі, мы павінны будаваць братэрства, каб пераадолець нянавісць, насілле і несправядлівасць”, - зазначыў Святы Айцец у відэазвароце з нагоды Міжнароднага дня агульначалавечага братэрства.
Папа выказаў сваю шчырую ўдзячнасць лаўрэатам Прэміі Заіда. “Тыя, хто быў узнагароджаны Прэміяй Заіда за чалавечае братэрства – 2024, вядомыя сваімі салідарнымі намаганнямі на карысць прагрэсу чалавецтва і спрыяння мірнаму суіснаванню. Я выказваю ім сваю падзяку і веру, што іх прыклад заахвоціць іншых распачаць ініцыятывы, якія вынікаюць з плённага супрацоўніцтва паміж людзьмі розных рэлігій, якія служаць усёй чалавечай сям'і, паважаюць годнасць кожнага і прасоўваюць каштоўнасці, прапанаваныя дакументам аб чалавечым братэрстве”, - сказаў Папа.
Пераможцамі Прэміі Заіда за чалавечае братэрства сёлета сталі: чылійская манахіня, сястра Нэлі Леон, егіпецкі кардыёхірург Магдзі Якуб і дзве інданезійскія дабрачынныя арганізацыі Nahdlatul Ulama і Muhammadiyah.
