Святы Айцец тэолагам: дапамагаць місійнаму навяртанню Касцёла
Аляксандр Панчанка - Pope
Францішак прывітаў сваіх гасцей, выказваючы пажаданне, каб больш жанчын брала ўдзел у працы гэтай структуры. Ён заклікаў тэолагаў спрыяць пераадоленню “маскулінізаванасці” Касцёла, памятаючы пра яго жаночае вымярэнне. Святы Айцец адзначыў, што гэту тэму будзе абмярковаўваць з кардыналамі, якія дапамагаюць яму ў кіраванні Касцёлам. Затым удзельнікі сустрэчы памаліліся разам з Папам і атрымалі ад яго тэкст прамовы, якую ён падрыхтаваў загаддзя.
Неабходна прысвяціць усе сілы нашага сэрца і розуму “місійнаму навяртанню Касцёла”, якое адпавядае закліку Езуса да евангелізацыі, пацверджанаму Другім Ватыканскім Саборам, і патрабуе ўдзелу ўсяго Божага Народа, - напісаў Святы Айцец.
Францішак звярнуў увагу на патрэбу ў “мысленні, якое будзе здольным пераканаўчым чынам паказваць Бога, які любіць, прабачае, збаўляе, вызваляе, падтрымлівае людзей і заклікае да братэрскага служэння”. У сувязі з гэтым ён заклікаў тэолагаў прапаноўваць “евангелізацыйную тэалогію”, якая будзе прасоўваць дыялог са светам культуры. “І вельмі важна, каб вы, тэолагі, рабілі гэта ў сугуччы з Божым народам”, маючы “прывілеяваны позірк на бедных і простых людзей” і “стоячы на каленях”, бо тэалогія нараджаецца падчас адарацыі Бога, - нагадаў Папа.
Пантыфік заўважыў, што ў цэнтры ўвагі членаў Міжнароднай тэалагічнай камісіі знаходзяцца два актуальныя выклікі: антрапалагічнае пытанне і тэма экалогіі; а таксама рэфлексія над непрамінальнай актуальнасцю трынітарнай і хрысталагічнай веры, вызнанай на Нікейскім саборы, 1700-годдзе якога будзе адзначацца ў 2025 годзе. Францішак назваў тры прычыны, якія робяць яго пасланне важным сёння.
У першую чаргу Папа згадаў пра духоўную прычыну, падкрэсліваючы, што на Нікейскім саборы была вызнана вера ў Езуса Хрыста, які з’яўляеццам “Богам ад Бога, святлом ад святла”. Пра Яго трэба сведчыць светлым жыццём і радасцю, якая выпраменьваецца, - падкрэсліў Пантыфік, заклікаючы тэолагаў, распаўсюджваць “новыя ўспышкі” гэтага “вечнага Хрыстовага святла ў доме Касцёла і цемры свету”.
Другая прычына – сінадальная. На Нікейскім саборы Касцёл мог выразіць сваю прыроду, веру, місію, каб быць “знакам і прыладай унутранага яднання з Богам і еднасці ўсяго чалавецтва”, - напісаў Папа. “Сінадальнасць – гэта шлях ператварэння ў адносіны адзінства і працэсы ўдзелу трынітарнай дынамікі, з якой Бог праз Хрыста і подых Святога Духа выходзіць насустрач чалавецтву”, - падкрэсліў ён, заклікаючы тэолагаў быць сведчаннем увагі Касцёла да сучасных культурных і сацыяльных працэсаў.
Францішак звярнуў увагу таксама на актуальнасць экуменічнага паслання Нікейскага сабора. “Як не згадаць пра надзвычайную важнасць гэтага юбілею для шляху да поўнага адзінства хрысціян! Нікейскі сабор не толькі аб’ядноўвае ўсіх вучняў Хрыста, але менавіта ў 2025 годзе, правідэнцыяльным чынам, дата святкавання Пасхі супадае ва ўсіх хрысціянскіх канфесіях. Як было б цудоўна, калі б гэта пазначыла пачатак сумеснага святкавання Вялікадня заўсёды!”, - пажадаў Святы Айцец.
