Папа паўднёвасуданскім бежанцам: стаць насеннем надзеі
Марыя Валодзіна - Pope
Папа падзякаваў бежанцам і перамешчаным асобам за малітвы, сведчанне і спевы, якімі яны сустрэлі яго. Ён выказаў ім сваю блізкасць і прыхільнасць, аднавіўшы свой рашучы і сардэчны заклік пакласці канец усім канфліктам, каб насілле спынілася, і людзі маглі вярнуцца да годнага жыцця. “Толькі пры ўмовах міру, стабільнасці і справядлівасці магчымыя развіццё і сацыяльная рэінтэграцыя. Больш адкладаць нельга: вялікая колькасць дзяцей, якія нарадзіліся ў апошнія гады, ведае толькі рэальнасць лагераў для перамешчаных асоб. Яны не памятаюць, што значыць мець дом. Яны губляюць сувязь з роднай зямлёй, каранямі і традыцыямі”, - адзначыў Святы Айцец.
Дзецям неабходна мець магчымасць хадзіць у школу, гуляць у футбол, а паўднёвасуданскаму грамадству – змешвацца і ўтвараць адзіны народ, прымаць выклікі інтэграцыі, вывучаць мовы, на якіх размаўляюць у краіне. Для ўсяго гэтага неабходны мір, - перакананы Францішак.
Папа нагадаў, што ў Паўднёвым Судане склалася цяжкая крызісная сітуацыя з бежанцамі: па меншай меры чатыры мільёны жыхароў краіны з'яўляюцца перамешчанымі асобамі. Адсутнасць харчовай бяспекі і голад закранаюць дзве траціны насельніцтва. Згодна з прагнозамі, у гэтым годзе гуманітарная трагедыя можа яшчэ больш пагоршыцца. Францішак падзякаваў тым, хто не сядзіць склаўшы рукі, аналізуючы сітуацыю, а працуе дзеля таго, каб усмешкі і надзея не сыходзілі з твараў дзяцей.
Святы Айцец перакананы, што “маці, жанчыны – гэта ключ да пераўтварэння краіны. Калі яны атрымаюць належныя магчымасці, дзякуючы сваёй працавітасці і прыроднаму дару абараняць жыццё, яны змогуць змяніць аблічча Паўднёвага Судана”. Пантыфік заклікаў усіх жыхароў краіны: “Калі ласка, абараняйце, паважайце, шануеце і цаніце кожную жанчыну, кожную дзяўчыну, маці і бабулю. У адваротным выпадку, не будзе будучыні”, - папярэдзіў ён.
Звяртаючыся да ўдзельнікаў сустрэчы, якія “не перастаюць марыць аб лепшай будучыні”, Папа выказаў жаданне акрыліць іх, усяліць у іх надзею: “Мы спадзяемся і верым, што нават у лагерах для перамешчаных асоб, дзе, на жаль, вы вымушаныя жыць з-за сітуацыі ў краіне, можа прарасці новае насенне, якое прынясе багатыя плады”, плады “урадлівага і пышнага росту гэтай краіны”. Будзьце насеннем надзеі, станьце дрэвамі і аднавіце кісларод братэрства, - заахвоціў Святы Айцец, заклікаючы маладых людзей рознага паходжання напісаць першыя старонкі новага раздзела гісторыі краіны: “Вы павінны стаць тымі, хто перапіша яе гісторыю як гісторыю міру!”
Папа скончыў сваю прамову словамі падзякі да ўсіх тых, хто дапамагае бежанцам і перамешчаным асобам. Ён падзякаваў касцёльным супольнасцям, місіянерам, гуманітарным і міжнародным арганізацыям, у тым ліку ААН, за падтрымку краіны ў гэты крызісны час. Ён ушанаваў памяць гуманітарных работнікаў, якія загінулі, і заклікаў да павагі да тых, хто працягвае аказваць дапамогу насельніцтву Паўднёвага Судана. У заключэнне Святы Айцец выказаў сваю блізкасць да паўднёвасуданскіх бежанцаў, якія жывуць за межамі краіны і не могуць вярнуцца на акупаваныя тэрыторыі, а таксама ўдзяліў адмысловае благаслаўленне дзецям Паўднёвага Судана.
