Regina caeli: Унебаўшэсцем Езус гарантуе спасланне свайго Духа
Аляксандр Амяльчэня - Pope
Тлумачачы сэнс Унебаўшэсця, якое з’яўляецца кульмінацыяй зямнога жыцця Езуса, Францішак нагадаў, што “Езус не пакідае сваіх вучняў”, “наадварот, праз сваё вяртанне да Айца Ён гарантуе ім спасланне свайго Духа”. У гэтым праяўляецца любоў Збаўцы да сваіх паслядоўнікаў.
“Яго прысутнасць – гэта не тая прысутнасць, якая імкнецца абмежаваць нашу свабоду. Наадварот, яна дае нам прастору, таму што сапраўдная любоў заўсёды спараджае блізкасць, якая не прыгнятае, а робіць нас галоўнымі героямі”, - растлумачыў Папа.
Ён звярнуў увагу, што “Езус, узыходзячы на неба, замест таго, каб фізічна заставацца побач з некалькімі вучнямі, становіцца блізкім усім праз свайго Духа”. “Праз Духа Святога Езус прысутнічае ў нас, перасякаючы бар'еры часу і прасторы, каб зрабіць нас сваімі сведкамі ў свеце”, - дадаў Пантыфік.
Хрыстус благаслаўляе апосталаў, і гэта па-сапраўднаму святарскі жэст. “Евангелле хоча сказаць нам, што Езус – першасвятар нашага жыцця. Езус узыходзіць да Айца, каб заступіцца за нас, прадставіць Яму нашу чалавечнасць. Такім чынам, перад вачыма Айца, разам з чалавечнасцю Езуса, ёсць і заўсёды будзе наша жыццё, нашы надзеі, нашы раны. Таму Хрыстус, узыходзячы на неба, пракладвае нам дарогу, ідзе, каб падрыхтаваць нам месца і з гэтага часу заступаецца за нас, каб Айцец заўсёды суправаджаў нас і благаслаўляў нас”, - заўважыў Папа.
Ён заахвоціў вернікаў спытаць сябе пра сваё евангельскае сведчанне, уменне “любіць іншых, пакідаючы іх свабоднымі і ствараючы для іх прастору”, гатоўнасць “заступацца за іншых” – маліцца за іх і благаслаўляць іх жыццё.
“Трэба вучыцца гэтаму: заступніцкай малітве, заступніцтву за надзеі і пакуты свету, за мір. І давайце благаслаўляць вачыма і словамі тых, з кім сустракаемся кожны дзень!” - заклікаў Францішак.
