Францішак заклікаў да міру ў Афрыцы і нагадаў пра беатыфікацыю
Аляксандр Амяльчэня - Pope
Францішак прызнаўся, што з заклапочанасцю сочыць за навінамі з рэгіёна Афрыканскага Рогу, асабліва з Эфіопіі, дзе ўжо больш за год працягваецца канфлікт, які прывёў да шматлікіх ахвяр і сур'ёзнага гуманітарнага крызісу. “Запрашаю ўсіх маліцца за гэты народ, які спазнаў настолькі вялікія цяжкасці, і аднаўляю свой заклік да гармоніі і мірнага шляху дыялогу”, - сказаў ён 7 лістапада 2021 г.
Папа таксама запэўніў у сваёй малітве пацярпелых у пажары, які адбыўся ў выніку выбуху паліва на ўскраіне Фрытаўна, сталіцы Сьера-Леонэ.
Пантыфік нагадаў, што 6 лістапада 2021 г. у іспанскім Манрэсе былі абвешчаныя благаслаўлёнымі тры мучанікі за веру з Ордэна Братоў Меншых Капуцынаў – а. Бэнэдыкт з Санта-Калома-дэ-Грамэнэт і два яго паплечнікі. “Яны былі забітыя падчас рэлігійнага пераследу мінулага стагоддзя ў Іспаніі, аказаўшыся сціплымі і мужнымі сведкамі Хрыста. Няхай іх прыклад дапаможа сённяшнім хрысціянам заставацца вернымі свайму пакліканню, нават у хвіліну выпрабаванняў”, - сказаў Святы Айцец.
