Анёл Панскі: гарантаваць бясплатную ахову здароўя кожнаму!
Аляксандр Амяльчэня - Pope
Як і гады таму св. Ян Павел, Францішак памаліўся Анёл Панскі з аднаго з балконаў рымскай універсітэцкай клінікі імя Агасціна Джэмэлі, дзе зараз знаходзіцца пасля аперацыі, зробленай тыдзень таму.
Падзякаваўшы за малітву, Святы Айцец пракаментаваў урывак нядзельнага Евангелля (Мк 6, 7-13), дзе гаворка ідзе пра вучняў Езуса, якія "шмат хворых намашчвалі алеем, і вылечвалі". Папа звярнуў увагу на тое, што гэты "алей" звязаны не толькі з сакрамэнтам хворых, "які ўмацоўвае дух і цела", але і з "слуханнем, блізкасцю, клопатам і пяшчотай тых, хто займаецца хворымі". Яны "падобныя на ласку, якая прымушае чалавека адчуваць сябе лепш, здымае боль і падымае настрой".
“Рана ці позна нам усім спатрэбіцца гэтае "намашчэнне", і мы можам перадаць яго камусьці іншаму, праз візіт, тэлефанаванне, працягнутую руку да тых, хто мае патрэбу ў дапамозе”, - аргументаваў Францішак.
Пантыфік прызнаўся, што ў шпіталі ён адчуў "важнасць добрай медыцынскай дапамогі, даступнай кожнаму, як гэта адбываецца ў Італіі і іншых краінах, – бясплатнай сістэмы аховы здароўя, што гарантуе добрыя паслугі, даступныя ўсім". “Мы не павінны страціць гэтую каштоўнасць! Мы павінны захаваць гэта!”, - адзначыў Францішак.
Папа выказаў "прызнанне і падтрымку ўрачам і ўсім медыцынскім работнікам і персаналу бальніцы". Ён заклікаў маліцца за "ўсіх хворых, асабліва тых, хто знаходзіцца ў самым цяжкім стане". “Няхай ніхто не застанецца ў адзіноце, няхай кожны атрымае намашчэнне слухання, блізкасці і клопату”, - папрасіў Святы Айцец.
На балконе яго суправаджала група хворых дзяцей – пацыентаў клінікі.
Францішак не першым з Пантыфікаў маліўся ў нядзелю з клінікі Джэмэлі. Раней гэта рабіў 22 разы з акна свайго бальнічнага пакоя св. Ян Павел II падчас знаходжання ў гэтым рымскім шпіталі ў 1981, 1992, 1994, 1996 і 2005 гадах.
