Папа да семінарыстаў: без паслухмянасці няма росту і сталення
Аляксандр Амяльчэня - Pope
Год св. Юзафа, які зараз ідзе ў Касцёле, натхніў Пантыфіка на разважанні, звязаныя з пакліканнем "гэтай надзвычайнай асобы”. Апякун Езуса вучыць нас, што без паслухмянасці ніхто не можа расці і сталець. Пантыфік папрасіў выхавальнікаў Папскай рэгіянальнай семінарыі імя Пія XI у Марке быць для семінарыстаў тымі, кім Юзаф быў для Езуса.
“Няхай яны вучацца пакоры ад вашага паслушэнства; працавітасці ад вашай самаадданасці; шчодрасці да бедных ад сведчання вашай цвярозасці і спагадлівасці; айцоўству дзякуючы вашай жывой і цнатлівай любові”, - пажадаў Святы Айцец.
Францішак выказаў перакананне, што для будучых святароў семінарыя “можа быць як дом у Назарэце, у якім Сын Божы ад бацькоў навучыўся чалавечнасці і блізкасці”. “Не задавальняйце тым, што вы ўмееце карыстацца сацыяльнымі сеткамі і медыя для камунікацыі. Толькі пераўтвораныя Словам Божым, вы зможаце дзяліцца словам жыцця. Свет прагне святароў, здольных сведчыць дабрыню Пана тым, хто зведаў грэх і няўдачы, святароў, якія валодаюць чалавечнасцю, душпастыраў, гатовых падзяляць радасць і цяжар сваіх братоў, людзей, якія ўмеюць пачуць крык тых, хто пакутуе”, - звярнуўся да сваіх маладых гасцей Пантыфік.
Папа прапанаваў “некалькі ідэй”, якія тычацца чатырох вымярэнняў фармацыі: чалавечага, духоўнага, інтэлектуальнага і душпастырскага. Ён прапанаваў семінарыстам “не бегчы ад сваёй чалавечнасці, не адмаўляцца ад складанасці свайго ўнутранага свету, пачуццяў і эмацыянальнасці; не закрывацца ў сабе падчас крызісу ці слабасці”.
Малітва, фундамент духоўнасці, “павінна быць не рытуалам, а нагодай для асабістай сустрэчы з Богам, для дыялогу з Ім і даверу да Яго. “Сачыце, каб літургія і супольная малітва не сталі цэлебрацыяй вас саміх”, - пажадаў Папа. Ён заклікаў маладых людзей ужо зараз “адчуваць сябе заступнікамі свету”.
Інтэлектуальная фармацыя, звярнуў увагу Святы Айцец, дапаможа будучым святарам “з усведамленнем і кампетэнтнасцю ўвайсці ў складанасць сучаснай культуры і думак, не баяцца і не ставіцца варожа да гэтага”. “Менавіта тут увасабляецца мудрасць Евангелля. І задача місіі, якая чакае вас, патрабуе сёння як ніколі кампетэнтнасці і падрыхтоўкі”, - адзначыў Францішак.
Душпастырская фармацыя дапамагае “з энтузіязмам ісці насустрач людзям”. Святар, які служыць народу Божаму, павінен клапаціцца пра раны ўсіх, асабліва бедных, - заўважыў Пантыфік, заклікаючы выхаванцаў семінарыі трымацца ўбаку ад любой формы клерыкалізму.
Завяршаючы сустрэчу, Францішак падзякаваў сваім гасцям “за сведчанне касцёльнай камуніі”.
