Папа зрабіў паслугі лектарату і акалітату даступнымі для жанчын
Ужо не адно дзесяцігоддзе жанчыны чытаюць Божае слова падчас літургічных цэлебрацый, служаць пры алтары ў якасці міністрантаў і раздаюць св. Камунію: у многіх каталіцкіх супольнасцях у розных частках свету гэта практыка была дазволена біскупамі.
Да гэтага часу, аднак, выкананне жанчынамі такога служэння адбывалася без інстытуцыйнага мандату, у абход рашэння Паўла VI, які ў 1972 г. захаваў доступ да лектарату і акалітату выключна для асобаў мужчынскага полу. Цяпер жа Францішак, у святле разважанняў, якія мелі месца падчас некалькіх апошніх Сінодаў Біскупаў, распарадзіўся зрабіць жаночую прысутнасць пры алтары афіцыйнай.
Апостальскім лістом “Spiritus Domini” Папа змяніў § 1 канона 230 Кодэкса кананічнага права, пастанавіўшы, што да ўзгаданых паслугаў могуць прызначацца і жанчыны; для гэтага павінен здзяйсняцца прадпісаны літургічны абрад.
У новай фармуліроўцы канона, гаворыцца, што “свецкія вернікі, якія дасягнулі таго ўзросту і валодаюць тымі здольнасцямі, якія вызначаны дэкрэтам Канферэнцыі Біскупаў, пасля здзяйснення прадпісанага літургічнага абраду, могуць прызначацца на пастаянныя паслугі лектарату і акалітату”. Дагэтуль тут гаворка ішла толькі пра “свецкіх мужчын”.
Пантыфік удакладніў, што яго дакумент стаў адказам на прапановы, якія гучалі падчас розных сінадальных асамблей. Ён заўважыў, што развіццё веравучэння ў апошнія гады “праліла святло на тое, што пэўныя паслугі, устаноўленыя Касцёлам, маюць у сваёй аснове агульны стан ахрышчаных і каралеўскае святарства, атрыманае ў сакрамэнце хросту”. У той жа час Папа падкрэсліў, што служэнне свецкіх вернікаў у Касцёле, “сутнасна адрозніваецца ад служэння прэзбітэраў, якое атрымліваецца з сакрамэнтам пасвячэння”.
Motu proprio суправаджаецца лістом да прэфекта Кангрэгацыі Веравучэння, кардынала Луіса Ладарыі Фэрэра, у якім Святы Айцец патлумачыў тэалагічныя прычыны свайго рашэння. Папа звязаў іх з абнаўленнем, пачатым Другім Ватыканскім Саборам, і тэрміновай патрэбай у “адкрыцці нанова сумеснай адказнасці ўсіх ахрышчаных у Касцёле і асабліва місіі свецкіх вернікаў”.
Францішак нагадаў словы св. Яна Паўла ІІ, пра тое, што “Касцёл ніякім чынам не можа ўдзяляць прэзбітэрскае пасвячэнне жанчынам”. На яго думку, доступ вернікаў абодвух палоў да паслугаў лектарату і акалітату зробіць больш плённым удзел усіх у евангелізацыйнай дзейнасці і павысіць прызнанне іх каштоўнага ўкладу ў місію Касцёла.
