Францішак і Сінадальныя Айцы сустрэліся з моладдзю
Кранальныя сведчанні, спевы, артыстычныя прадстаўленні, відэазамалёўкі аб турботах, радасцях і марах сучаснай моладзі складалі галоўную частку чування, арганізаванага Кангрэгацыяй Каталіцкай Адукацыі. Маладыя людзі распавядалі пра свой досвед, звязаны з рознымі жыццёвымі сітуацыямі, вучобай, працай, пачуццямі, мінулым і распазнаннем паклікання.
Папа асабіста пажадаў сустрэцца з юнакамі і дзяўчатамі, каб іх прапановы маглі ўзбагаціць Выніковы дакумент трываючага ў Ватыкане Сінода Біскупаў. Спасылаючыся на шматлікія пытанні моладзі Францішак зазначыў, што адказы на іх дадуць менавіта Сінадальныя Айцы, бо калі б гэта зрабіў ён, Сінод быў бы непатрэбны.
У той жа час Пантыфік даў сваім гасцям некалькі парадаў. У першую чаргу ён заклікаў моладзь пастаянна знаходзіцца ў дарозе, гледзячы наперад, а не ў люстэрка. Важна быць юнакамі і дзяўчатамі, якія не праводзяць свой час на канапе, як 24-гадовыя пенсіянеры, сказаў ён. Папа параіў моладзі шукаць сябе, выходзячы насустрач дабру і прыгажосці.
Паводле Святога Айца, важнай з’яўляецца шчырасць і паслядоўнасць у жыцці. Францішак выказаў разуменне ў сувязі з крытыкай у адрас Касцёла, калі ён вучыць евангельскім благаслаўленням, а сам паддаецца “княжаскаму і скандальнаму клерыкалізму”, які з’яўляецца найгоршым перакручваннем сутнасці касцёльнага служэння.
Пантыфік зазначыў, што сапраўдная ўлада выражаецца ў тым, каб дапамагаць людзям узрастаць. Іншае разуменне ўлады – гэта праява эгаізма і жадання прыніжаць і знявольваць людзей, перакананы ён.
Святы Айцец нагадаў пра важнасць разважлівага выкарыстання сучасных сродкаў камунікацыі. Ён падкрэсліў, што гаджэты не павінны адцягваць ад рэальнага жыцця і сустрэчы з канкрэтнымі людзьмі. Калі так адбываецца, трэба абмежаваць карыстанне імі.
Канкрэтнасць, паводле яго слоў, павінна выражацца таксама ў гасціннасці. Папа асудзіў папулізм, накіраваны супраць мігрантаў, і зазначыў, што гэтая, папулярная сёння з’ява, не мае нічога супольнага з сапраўднай культурай народа. Папулізм – гэта закрытасць, а любоў адкрывае дзверы, сказаў ён.
На заканчэнне сустрэчы Францішак параіў моладзі часцей размаўляць з пажылымі людзьмі, якія з’яўляюцца карэннем, без якога немагчыма прыносіць плёны. Дзякуючы гэтым караням, моладзь, у сваю чаргу, можа стаць карэннем для іншых пакаленняў, сцвердзіў Святы Айцец.
Перад тым як пакінуць Залу Паўла VI Пантыфік атрымаў ад моладзі спіс пытанняў, якія перадасць Сінадальным Айцам.
