Пантыфік: да вялікіх рэчаў праз вернасць у малых
У Эўхарыстыі ўдзельнічалі сёстры з Кангрэгацыі св. Юзафа Каталенга, якія сёлета адзначаюць 50-годдзе манаскага жыцця, і некалькі эрытрэйскіх святароў, якія нясуць душпастырскае служэнне ў Італіі.
У гаміліі Францішак спаслаўся на Першае чытанне Літургіі слова з 9-га раздзела Кнігі Дзеяў Апосталаў, дзе апісваецца навяртанне св. Паўла. Ён адзначыў, што падзея стала новай старонкай у гісторыі збаўлення: Касцёл адчыніў дзверы для язычнікаў, стаў паўсюдным. Пантыфік нагадаў, што Павел быў чалавекам паслядоўным і сумленным, нават тады, калі пераследаваў хрысціян. Ён таксама быў паслухмяным, пакорлівым, не ўпартым, “адкрытым для прапаноў Бога”.
Затым Францішак звярнуўся да прысутных на св. Імшы законніц і падзякаваў ім за паслухмянасць Богу. Ён узгадаў, што амаль 50 гадоў таму наведаў адзін з дамоў Кангрэгацыі, дзе сёстры прымаюць людзей з абмежаванымі фізічнымі і разумовымі магчымасцямі.
“Нястомнасць. Гэта сігнал Касцёла. Сёння я хацеў бы падзякаваць Вам за многіх адважных мужчын і жанчын, якія рызыкуюць сваім жыццём, якія ідуць наперад, якія шукаюць новыя шляхі ў жыцці Касцёла”, - сказаў Папа. Ён дадаў, што гэтыя новыя шляхі павінны быць Божымі.
“Трэба рухацца наперад: наперад у глыбіню малітвы, у глыбіню пакоры, сэрца адкрытага на голас Бога – менавіта такім чынам адбываюцца рэальныя змены ў Касцёле, – з людзьмі, якія ведаюць, як змагацца ў малых і вялікіх рэчах”, - патлумачыў Святы Айцец.
Францішак заўважыў, што хрысціянін павінен мець “аднолькавую харызму рэчаў вялікіх і малых”. Ён лічыць, што не трэба палохацца вялікіх рэчаў. Усё атрымаецца, калі застанёмся вернымі ў рэчах малых.
