Шырокая дыскусія тэолагаў Германіі вакол міграцыйнай палітыкі
Аляксандр Амяльчэня - Pope
Як паведамляе Каталіцкае інфармацыйнае агенцтва (KNA), галоўным пунктам спрэчак стала сумесная ініцыятыва кансерватыўнага блока ХДС/ХСС і правай партыі Альтэрнатыва для Германіі (AfD).
"Я вельмі ўдзячная за дакладную і ясную пазіцыю каталіцкага і евангельскага бюро ў Берліне", - заявіла выкладчыца хрысціянскага сацыяльнага вучэння Урсула Нотэле-Вільдфоер на партале kirche-und-leben.de. Яна падкрэсліла, што Касцёл павінен выразна выступаць за гуманнасць і еднасць у грамадстве.
"Гуманнасць азначае годнасць для кожнага чалавека, незалежна ад колеру скуры, рэлігіі, паходжання і полу", - падкрэслівае тэолаг Томас Зёдынг у часопісе Communio. Ён адзначае, што пагранічны кантроль неабходны, але нельга адмаўляць людзям толькі з прычыны іх паходжання.
Каталіцкі маральны тэолаг і сацыёлаг Петэр Шаленберг выступіў з крытыкай самой канцэпцыі дэмакратычнай сцяны (Brandmauer) – прынцыпу, які прадугледжвае катэгарычную адмову дэмакратычных партый ад любога супрацоўніцтва з палітычнымі сіламі, якія лічацца экстрэмісцкімі ці антыдэмакратычнымі. Ён прасоўваецца вядучымі нямецкімі палітычнымі партыямі, якія ўваходзяць у цяперашнюю кіруючую кааліцыю. Гэты прынцып падтрымліваюць таксама многія грамадскія арганізацыі і рэлігійныя супольнасці.
У сваім аўтарскім артыкуле, апублікаваным у часопісе Cicero, Шаленберг прапанаваў арыгінальнае параўнанне дэмакратыі з матэматыкай і музыкай. "Той факт, што правыя экстрэмісты таксама падтрымліваюць тэарэму Піфагора ці прызнаюць прыгажосць сімфоній Моцарта, не робіць ні тое, ні другое няправільным. Максімум, чаго можна было б пажадаць – гэта больш разумных прыхільнікаў", - адзначыў ён.
Тэолаг падкрэслівае, што дэмакратыя – гэта "не вытанчаны канцэрт па жаданні і не дасканала адшліфаваная матэматычная праверачная работа ў старэйшых класах гімназіі". На яго думку, спробы стварыць штучныя бар'еры ў дэмакратычным працэсе могуць прывесці да празмернай ідэалізацыі і адрыву ад рэальных грамадскіх праблем.
Каталіцкі сацыяльны этык Эльмар Нас выступіў у абарону ініцыятыў ХДС/ХСС, нягледзячы на крытыку з боку многіх калег. У інтэрв'ю каталіцкаму парталу domradio.de ён падкрэсліў, што права на прытулак не павінна быць аслаблена, аднак дэмакратычнае грамадства мае патрэбу ў адкрытай дыскусіі.
"Такія абмеркаванні і нават супярэчлівыя прапановы з'яўляюцца неад'емнай часткай функцыянуючай дэмакратыі. Той, хто спрабуе забараніць такія дыскусіі, наносіць шкоду самой дэмакратыі", - падкрэсліў Нас. Па яго меркаванні, спробы абмежаваць публічнае абмеркаванне міграцыйных праблем могуць прывесці да больш сур'ёзных наступстваў для дэмакратычнага грамадства, чым сама дыскусія.
