Кардынал Тагле заклікаў вернікаў дзяліцца дарамі Эўхарыстыі з іншымі
Марыя Валодзіна - Pope
У сваім разважанні на евангельскую тэму Кангрэса Заставайцеся ўва Мне (Ян 15, 4) кардынал Тагле падкрэсліў, што місія Езуса – гэта дар Айца. Ён патлумачыў, што Эўхарыстыя ўвасабляе гэты дар, бо Езус аддаў сваё Цела і Кроў дзеля жыцця свету.
Про-прэфект Дыкастэрыі па евангелізацыі заклікаў вернікаў успрымаць сваё жыццё і навакольны свет як дар, а не як дасягненне. "Ці глядзім мы па-ранейшаму на сябе, людзей, прадметы, працу, грамадства, падзеі і тварэнне як на дар?" - спытаў ён, папярэдзіўшы, што страта гэтай перспектывы вядзе да эгацэнтрызму і адсутнасці місіянерскай стараннасці.
Кардынал Тагле нагадаў пра цяжкую рэальнасць, у якой апынуліся вучні, якія пакінулі Езуса (Ян 6), прапанаваўшы задумацца аб тым, ці спрыяюць часам дзеянні Касцёла таму, што людзі аддаляюцца ад Езуса. Іерарх падкрэсліў неабходнасць вітаць у касцёльных супольнасцях маргіналізаваных людзей, бедных, мігрантаў, пажылых, каб і яны адчувалі сябе часткай Касцёла.
Ён заклікаў тых, хто вырашыў застацца з Езусам, быць гатовымі стаць Яго місіянерамі. "Мы не павінны трымаць Езуса для сябе. Гэта не апостальства. Гэта эгаізм", - заявіў ён, заклікаючы вернікаў дзяліцца любоўю і спачуваннем, якія яны атрымалі ад Езуса, з стомленымі, страчанымі і падзеленымі.
Спецыяльны пасланнік перадаў удзельнікам Кангрэса благаслаўленне Францішка, выказаўшы надзею, што яны змогуць дзяліцца з іншымі людзьмі тымі ўніверсальнымі дарамі, якія яны атрымліваюць падчас Эўхарыстыі.
У якасці прыкладу, які добра ілюструе неабходнасць дзяліцца дарамі Эўхарыстыі з блізкімі, кардынал Тагле распавёў гісторыю, якая адбылася з ім, калі ён быў парафіяльным святаром. Адна жанчына, незвычайна адданая Касцёлу, прысутнічала там заўсёды і пры любых абставінах. Калі ён падзякаваў ёй за адданасць і папрасіў падзякаваць сям'і за тое, што яна дазваляе ёй дапамагаць Касцёлу, яна адказала, што яе пастаянная прысутнасць звязана з тым, што яна пазбягае сваёй сям'і. Калі Імша скончана, ідзіце і “дзяліцеся з іншымі тым, што вы пачулі, да чаго дакрануліся і што паспрабавалі", - заклікаў іерарх.
