Катар: тысячы хрысціян на навагодніх набажэнствах
Аляксандр Амяльчэня - Pope
Біскуп Альда Берардзі, апостальскі вікарый для Паўночнай Аравіі, назваў цэнтральную Імшу ў мінулы панядзелак “знакам надзеі і адзінства” для каталіцкай супольнасці ў краіне.
Пробашч катэдры Маці Божай Ружанцовай у Досе, сталіцы Катара, ксёндз Саўер д’Соўза, падзякаваў біскупу за яго “нястомныя намаганні” на карысць супольнасці. Ён таксама выказаў падзяку эміру Катара і жыхарам краіны за падтрымку ў будаўніцтве касцёльных структур.
Катэдра, асвечаная ў 2008 годзе, з'яўляецца першым каталіцкім храмам у эміраце. Зямельны ўчастак для яе будаўніцтва выдзеліў асабіста эмір. Сёння храм стаў цэнтрам хрысціянскага жыцця ў так званым рэлігійным раёне Дохі. Тут размешчана некалькі іншых хрысціянскіх цэркваў.
Біскуп Берардзі ўжо даўно плануе пабудаваць больш каталіцкіх касцёлаў. Вікарыят Паўночнай Аравіі ўключае ў сябе таксама такія краіны, як Бахрэйн і Саудаўская Аравія – становішча хрысціянскіх супольнасцей там вельмі рознае.
